Теміржолшылар балаларды қорғаудың үшайлығын бастады
![](https://rail-news.kz/uploads/posts/2019/6/3/1559581173311.jpg)
Ағымдағы жылдың 28 мамырында «ҚТЖ-Жүк тасымалы» АҚда теміржол инфрақұрылымы нысандары орналасқан аумақта жүру барысында ережелерді сақтау мәселелері бойынша брифинг өтті.
«ҚТЖ-Жүк тасымалы» АҚ-ның өндірістік қауіпсіздік жөніндегі атқарушы директоры Айтым Құрақбаев жарақаттанудың алдын алу бойынша теміржолшылар тарапынан атқарылып жатқан жұмыстар туралы әңгімелеп берді. Оның айтуынша, биыл өткен төрт ай ішінде локомотив пайдалану деполарының машинистерімен жолда бөгде адамдарды басып кетудің алдын алу үшін 880-нен астам рет шұғыл тежегішті басқан. Тек 10 жағдайда адамды басып кетудің алдын алу мүмкін болмаған. Үш жағдайда 2002, 2006, 2008 жылдары туылған балалар қаза болған. Бақылаусыз қалған балалар ойнауға темір жолды таңдап алып, вагондарға шығып, соңы ажал құштырған электрожарақаттар алған.
Бүгінде көптеген адамдар құлаққап киіп алып, жол үстімен жүріп, жақындап қалған пойыздың да ащы үнін естімей жатады. Адамдардың бейқамсыздық танытуы, қырағылықты жоғалтуы, сайып келгенде, қайғылы оқиғаларға әкеліп жатады. Осындай мәселелерге алаңдаушылық білдіретін теміржолшылар ұдайы халыққа қауіпсіздікті сақтау ережелерін түсіндіріп, кездесулер өткізіп тұрады.
Айталық, ағымдағы жылдың төрт айында да еліміздің әртүрлі өңіріндегі теміржолшылар 18 мыңнан астам мектеп оқушылары мен 12 мыңнан астам адамға теміржолдар мен нысандарда жүру кезінде қандай қауіп-қатерлердің болуы туралы кеңінен баяндап берген. Сонымен қатар оқу мекемелері мен кәсіпорындарға бейнероликтер көрсетілген 313 әңгімелесукеңестері ұйымдастырылған. Бұдан бөлек, қауіпсіздік жөніндегі 5000нан астам жадынама әзірленіп, 10ға жуық бейнеролик шығарылып, таратылған.
«Желілік ішкі істер департаменті, Әскерилендірілген темір жол күзеті қызметкерлерімен бірлесіп теміржолдардан өту ережелерін түсіндірген 900-ге жуық әңгімелесулер өткізілді. Теміржолшылар негізгі жұмыстарынан бөлек, алтын уақыттарын бөліп, оқу жылының соңында мектептерде өтетін ата-аналар жиналысына қатысады. Жиналыстарда ата-аналарға балаларды бақылауда ұстау керектігін еске сала отырып, теміржолдың қауіптілігі жоғары аймақ екендігін түсіндіреді. Қауіпсіздік мәселелері бойынша Үйлестіру кеңесінің 63 отырысы өтті. Оған көлік прокуратурасы, полиция, өзге де тиісті қызметтер мен БАҚ өкілдері шақырылып, қатысты. Міне, қазір жазғы каникул басталды. Осыған орай, балалардың жарақаттануының алдын алу бойынша үш айлық жарияланып отыр. Оның шеңберінде тұтас шаралар кешені ұйымдастырылмақ. Сонымен қатар кейбір қалалар мен ауылдардағы теміржолға жақын орналасқан оқу мекемелері жанындағы лагерьлерде қауіпсіздікке арналған сағаттар өтетін болады. Балаларға темір жолда өзін ұстау ережесі ойын түрінде әңгімеленіп, мультфильмдер мен бейнефильмдер көрсетіледі», – деп атап өтті Айтым Құрақбаев.
Теміржолдарда жарақат алу – бұл тек теміржолшылардың ғана емес, жалпыға ортақ әлеуметтік проблема. Сондықтан сала еңбеккерлері адамдарды теміржолда қырағы және сақ болуға шақырады.