Нұр-Сұлтан станциясында үшайлық жалғасуда
![](https://rail-news.kz/uploads/posts/2019/6/8/1559992253226.jpg)
Нұр-Сұлтан станциясында биыл 15 мамырда басталған «Темір жол станциясының сапалы техникалық тарату акті (ТРА) – пойыздар қозғалысы қауіпсіздігін қамтамасыз ету кепілі» атты үшайлық жалғасуда.
Бұл айлық барысында атқарылатын шаралар тізілген жоспарға сәйкес барлық жұмыс орындарында үшайлықтың өткізілетіні туралы аншлагтар ілінген. 17 мамырға дейін техникалық тарату актінің қолданыстағы құрылғымен сәйкестігін тексеруге жұмысшы тобы құрылған. 28 мамырға дейін жүк қабылдап, жөнелтетін жолдардың, атап айтқанда, жұп, тақ, басты, сұрыптау, ранжирлік, дөңесалды парктеріндегі жолдардың іс жүзіндегі пайдалы ұзындығының станция ТТА-сымен сәйкестігі тексерілген. Кіреберіс жолдарда қозғалысты ұйымдастыру және қызмет көрсету туралы жергілікті нұсқаулықтың техникалық құжатпен және вагондарды жуу және тапсыру шартына сәйкестігі де назарға алынған. Сонымен қатар станцияның пойыздар қабылдап, жөнелту, жүк түсіріп, тиеу, ақаулы вагондарды ағыту бойынша жұмыстарының технологиялық процестерінде ТЖБАЖ, яғни тасымалды жедел басқарудың автоматтандырылған жүйесіне мәліметтер енгізу реті де тексерілуде. Айлық шеңберінде СОБ нұсқаулығы пульт табломен, станцияның ауқымды жоспары ТТА 1.5 тармағымен салыстырыла қаралады. Барлық өзгерістер енгізілген соң ТТА қайта жасалады және оның мәліметтері мен қосымшалары толықтай тексеріледі.
– Жалпы станцияның ТТА-сі пойыздарды жөнелту және өткізу, сонымен қатар кедергісіз, әрі қауіпсіз қабылдауды қамтамасыз ететін техникалық құралдарды қолдану тәртібін, маневрлік жұмыстарды қауіпсіз жүргізу ретін бекітеді. Еліміздегі барлық станцияларда өткізіліп жатқан үшайлық шеңберінде станция ТТА-сі мен оның қосымшасын жасау бойынша жауапты тұлғалардың білімі тексерілуде. Бұл өте маңызды шара 15 тамызда аяқталады, – дейді станцияның бас инженері Бақытхан Әбеуов.