«Денсаулық» пойызы 36 күнде 36 станцияға тоқтады

Биыл 29 сәуірде Алматы қаласынан сапарға шыққан «Денсаулық» пойызы осы аралықта 36 станцияға тоқтап, барлығы 260 мыңнан астам шалғай ауылдар тұрғындарына қызмет көрсеткен.

Қазақстанның темір жол бойындағы шалғай аудандарын тегін медициналық көмекпен қамтамасыз ететін медициналық пойыз жолға шыққалы бүгінге дейін 36 күн ішінде Медеу, Жетісу, Байсерке, Жетіген, Екпінді, Шелек, Құндызды, Алтынкөл, Іле, Қосқұдық, Дала, Жоламан, Малайсары, Айнабұлақ, Көксу, Егінсу, Лепсі, Жайпақ, Достық, Бескөл, Ақтоғай,Таңсық, Аягөз, Үшбиік, Жарма, Жаңғызтөбе, Предгорная, Тишинская, Черемшанка, Огнёвка, Зыряновск, Тургусун, Заводинка, Бұқтырма, Суықбұлақ, Ауыл станцияларына тоқтап, сол елді мекендер тұрғындарын қабылдаған. Мамандардың берген мәліметіне қарағанда, осы станциялардан барлығы 5216 адам медициналық тексеруден өтіп, міндетті әлеуметтік медициналық сақтандыру бойынша ақпараттық түсіндіру жұмыстары 2343 адамға жүргізілген. 4 маусымдағы дерек бойынша медициналық пойыз Белағаш станциясының халқына қызмет көрсетуде.

Еске сала кетейік, осы жылы аталған пойыз бойынша медициналық көмек алатын облыстар саны артып отыр. Пойыз 21 желтоқсанға дейін 14 облысты аралайтын болады. Медициналық пойыз кестесіне сәйкес бірінші болып Алматы облысының тұрғындарына тегін медициналық көмек көрсетілген. Одан әрі пойыз Шығыс Қазақстан, Солтүстік Қазақстан және Ақмола облыстарына бағыт алады. Бұдан әрі «Денсаулық» пойызының батыс өңірлерге алған бағыты оңтүстікте жалғасады да, Жамбыл облысында өз бағдарын аяқтайды. Жалпы алғанда пойыз 195 бекетті айналып өтеді, ал жалпы жүріп өту қашықтығы 19 000 км-ден аспақ.

Жобаның іске қосылуы еліміздің шалғай аудандарында сапалы медициналық көмекке қолы жетпей жүрген тұрғындар үшін өте маңызды. Келген халыққа жедел диагностика жасауға мүмкіндік беретін жоба аясында әрбір адам тегін медициналық көмек ала алады. Өткен жылы медициналық пойыздар 124 станцияны аралап, 42 мыңға жуық халыққа қызмет көрсеткен. Биыл 60 мыңнан астам тұрғынға қызмет көрсету жоспарлануда.

«Қазақстан темір жолы» ҰК» АҚ-ның Әлеуметтік жобалар қоры жоба әкімшісі болып табылады және пойыздардың жұмысы, техникалық қызмет көрсетілуі, жөнделуіне жауап береді. Қор пойызды, құралдарды күзету, сақтауды, персоналды күзетуді ұйымдастырып, пойыз құрамын тамақтандыруды қамтамасыз етеді. Бағдардың барлық бағытында пойыз телефон және интернетпен үздіксіз қамтылады. Ал пойыздың тоқтаусыз жұмысы пойыз бригадасының міндетінде.