Жазғы маусымға - қосымша пойыздар
![](https://rail-news.kz/uploads/posts/2019/6/14/1560491564784.jpg)
Жаз – демалыс маусымы. Көліктің кез келген түріне сұраныс артып, әсіресе ұшақ пен пойызға билет қасқалдақтың қанындай тапшы болып, бағасы шарықтап кететін кез – дәл осы маусым.
«Жолаушы тасымалы» компаниясы осыған орай тек жаз маусымында бірнеше пойызға қосымша құрамдар жіберетінін хабарлап отыр. Атап айтқанда, №201/210 қатынасындағы «АлматыТүркістан» пойызы 13 маусым мен 30 тамыз аралығында бұрынғыдай бір рет емес, аптасына екі рет қатынайтын болады.
Сол сияқты №207/208 қатынастағы «Алматы-Шымкент» жолаушылар пойызы да осы сөз болып отырған аралықта аптасына 2 рет жүріп тұратын болады.
№205/206 қатынасындағы «Маңғыстау-Бейнеу» пойызы бұрын аптасына 2 рет жүрсе, енді жаз маусымында ол күнара жүретіні де түбек халқының көңілінен шығатыны сөзсіз.
Сондай-ақ, 30 маусым мен 30 тамыз аралығында «Нұр-Сұлтан» – Достық» бағдары бойынша қосымша пойыз жіберілетін болады деп күтілуде. Жаңа пойыз аптасына 2 рет жүретін болады.
Ұлттық тасымалдаушы мұның бәрі жаппай демалыс маусымында билет тапшылығы туындап, дүрбелең орын алмас үшін жолаушы халықтың игілігі үшін жасалып жатқанын айтады. Дегенмен, азаматтарға сапарларын алдын ала жоспарлап, билетке де алдын ала тапсырыс беріп, сатып алудың тиімділігін ескертеді.