Қазақстандық студенттер «ҚТЖ» мен басқа ірі компаниялардан тағылымдамадан өтпек
![](https://rail-news.kz/uploads/posts/2019/6/18/1560837784914.jpg)
Биылғы жастар жылы аясында ел жастарын қолдау мен дамытуға бағытталған жобалар бойынша жазғы үш ай ішінде қазақстандық студенттер «ҚТЖ» ҰК» АҚ мен басқа ірі компаниялардан тағылымдамадан өтпек.
«Самұрық-Қазына» ҰӘҚ» АҚ-ның жас IT-мамандарға арналған үш айлық «Цифрлық жаз» тағылымдама бағдарламасының соңғы кезеңі басталды. Тағылымдаманың қорытындысы бойынша үздік үміткерлер жұмысқа орналасады. Биыл бағдарламаның шарттары неғұрлым қатал болғанына қарамастан, жас мамандар өздерінің білімдерін, ақпараттық технология саласында дамуға қабілеттері мен ынталарын көрсеткен. Байқауға қатысуға 1500ден астам адам ниет білдіріп, оның 78-і төрт іріктеу кезеңінен өткен. Ендігі кезекте үміткерлер елдегі ең үздік IT-мамандардан практикалық тәжірибе алады. Іріктеуден өткен үміткерлер – Нұр-Сұлтан, Алматы және Атырау қаласының ЖОО студенттері.
Сонымен қатар, биыл тағылымдамада студенттерге ақы төленеді және оларға арнайы менторлық бойынша оқытылған компаниялардың топменеджерлері тәлімгер болады. Сондай-ақ, үміткерлер SAP, Microsoft, Oracle, Cisco, HP, IBM, Huawei, Kaspersky, QazClaud, Astana Hub сынды әлемдегі ірі IT компаниялардан практикалық тәжірибе алады.
2019 жылдың 17 маусымынан 29 тамызына дейін үміткерлер тағылымдамадан өтетін 12 ірі компанияның ішінде «Қазақстан темір жолы» ҰК» АҚ да бар. Тағылымдаманың қорытындысы бойынша Қор ең үздік үміткерлерді алты IT бағыт бойынша жұмысқа орналастырады: жүйе әкімшісі, IT менеджер, IT бизнес сарапшысы, әзірлеуші, желі әкімшісі, инженерсарапшы/ақпараттық қауіпсіздік бойынша кеңесші.