Енді Ауғанстан теміржол көлік жүйесі қазақстандық рельстермен жүретін болады
Ақтөбе облысы бойынша меншікті тілші
Отандық экспорт жаңа нарыққа шықты. Қазақстанда жасалған рельстерге Ауғанстан елі қызығушылық танытып отыр. 120 метрлік жоғары сапалы рельстер қазіргі уақытта Кабул қаласында салынып жатқан теміржолға төселіп жатыр.
Жуырда, яғни 25-26 маусым аралығында Ауғанстан астанасы Кабул қаласына қазақстандық тауар өндірушілерге арналған экономикалық көрме өтеді деп күтілуде. Іс-шараның мақсаты – іскерлік қарым-қатынасты нығайту. Ауғанстандық және қазақстандық кәсіпкерлар арасында тұрақты байланыс орнатып, екі елдің өзара тауарайналымын ұлғайту. Шараға Ақтөбе рельсарқалық зауыты да қатысады. Зауыт директоры Ербол Мергенов Кабул басшыларымен өткен жылғы көрмеден кездесіп, екіжақты байланыс орнатқандарын айтады.
«Енді Ауғанстан еліндегі теміржол көлік жүйесі қазақстандық рельстермен жүретін болады. Жаңа жолдардың табанының ені – 1520 мм. Біз Р65 табанды рельстер өндіреміз. «Afghanistan Railway Authority» компаниясымен өткен жылдың жазында келісімшартқа отырған болатынбыз. Ол жаққа биыл қыс айында көлемі 330,888 тонна болатын жүктер жеткізілді», – дейді Ақтөбе рельсарқалық зауытының басшысы.
Ақтөбе рельсарқалық зауытында шығарылатын өнімнің барлығы халықаралық стандартқа сай, Түрікменстан, Өзбекстан, Әзербайжан, Ресей, Белоруссия елдеріне экспортталып келді. Қазір бұл қатарға Ауғанстан да қосылып отыр.