Теміржолдың аса қауіпті аймақ екенін түсіндірілді
![](https://rail-news.kz/uploads/posts/2019/6/19/1560923896777.jpg)
Теміржолдың аса қауіпті аймақ екенін біле тұра одан өтерде қарапайым ережелерді сақтамай, бастарын қауіп-қатерге тігетін адамдар қауіпсіздігі үшін теміржолшылар қосымша түсіндіру жұмыстарын тұрақты жүргізіп отырады.
Теміржолдың жағасында тұратын, әрлі-берлі теміржол арқылы қатынайтын ересектер мен балаларға арналған түрлі шаралар, рейдтер өткізу бүгінде барлық жерде ұйымдастырылып жатыр. Оның үстіне мектеп оқушылары үшін 3 ай жазғы каникул басталды.
Астана сигнализация және байланыс дистанциясы бұл бағытта арнайы жоспар құрып, кешенді түрде жұмыс жүргізуде. Мекеменің еңбек қорғау және қауіпсіздік техникасы жөніндегі жетекші инженері Нұргүл Жақсыбаеваның айтуынша, олар жыл басынан бері барлығы үш жүзге жуық оқушылар мен студенттерді қамтыған бірнеше оқу орнында кездесу өткізіп, түсіндіру жұмыстарын жүргізген. «Сонымен қатар дауысзорайтқыш құралдардың жарамдылығын тексеріп, өткелден, жолдан өткен жолаушылар үшін дауысзорайтқышпен айтылатын хабарламалардың анықтылығына мән бердік. Жұмысшылармен жоспардан тыс нұсқаулық өткізіліп отырады. Оларға осы нұсқаулық барысында өткелдер мен жолдарда, перегондарда немесе соларға жақын жерлерде бөгде адамдар мен балаларды кездестірсе, олармен профилактикалық жұмыс жүргізуі міндеттеледі. Сонымен қатар қолданыстағы бейнебақылау камераларының жарамдылығы қаралады. Бейнебақылау камералары кеңседе, сұрыптау дөңесте және эксплуатациялық техникалық қосында бар», – дейді жетекші инженер.
Ал Астана электрмен жабдықтау дистанциясының еңбек қорғау және қауіпсіздік техникасы бойынша жетекші инженері Аян Мадиевтің айтуынша, олар жыл басынан бері 13 мектеп пен колледжге барып, барлығы 2798 қатысушыға темір жолдан өту ережесін түсіндірген. Бұл жұмыстар Қырқыншы, Тастақ, Сарыоба, Төңкеріс, Еркіншілік және Нұр-Сұлтан станцияларындағы оқу орындарында жүргізілген. Жоспарда атқарылуы тиіс бірнеше тармақтардың қатарында түсіндіруден бөлек перрондарды, жол алқымдарын, жолаушылар көпірлерін жарықтандыру жұмыстары да жасалған.
Теміржолшылар жазғы демалыс маусымы басталуына орай одан әрі сақтық шараларын күшейтіп, балалар мен олардың ата-аналарының темір жолдан өтерде аса сақ болуын сұрайды.