25 жылдыққа 25 игі іс

Жаңалықтар

20.09.2016, 16:04

Семейлік теміржолшылар ағымдағы жылы қолға алынған «25 жылдыққа 25 игі іс» патриоттық акциясы аясында бірқатар нәтижелерге қол жеткізуде. Елдігіміздің асқақ белгісі саналатын осынау күннің аясында теміржолшылар арасында қазақстандық патриотизмді ту еткен рухани-мәдени шаралар мен әлеуметтік жобалар көптеп жүзеге асуы тиіс. Тыңнан қойылған бұл идея – Семей жүк тасымалдау бөлімшесі басшылығының бастамасы. Егемендік меретойына орай бөлімшеге қарасты ұйымдар мен мекемелер жыл басынан бері көптеген жобаны сәтімен орындауда. Атап айтқанда, бөлімше басшысы Марлен Көкірекбаевтың ұсынысымен аз қамтылған теміржолшылар отбасыларына бірнеше рет материалдық тұрғыдан көмектер берілді. Бұл игілікті шараны іліп әкеткен жастар ұйымы бастамаға жаңа қырынан келіп, бөлімше ауласында шағын жәрмеңке ұйымдастырып, түскен қаражатты мүгедек балалары бар жанұяларға дәрі-дәрмек алып, ем-дом жүргізу үшін тарту етті. Мұнымен қатар, бөлімше өнерпаздары желі бойына гастрольдік сапарларға шығып, шалғай станциялардағы теміржолшылар алдында концерттік бағдарламалар ұйымдастырды. Семей локомотив пайдалану депосының директоры Дәулет Ыдырысов бөлімшедегі ардагерлер кеңесіне өз қаражаты есебінен қаржы бөліп, аға буынның батасын алды. Қорыта айтсақ, бөлімшедегі ардагерлер кеңесі, жастар ұйымы мен кәсіподақ аталмыш шаралардың көшбасында тұр. Мұндай игі істер қатары таяп қалған Тәуелсіздік мейрамына орай қарқын алмақ. –Егемендігіміздің ширек ғасырлық мерекесін атап өту аясында әсіресе, жастардың бойындағы отаншылдық сезімді ұштай түсу қажет. Яғни, әрбір жас толқын теміржолшы өз елінің жетістігіне, өзі қызмет ететін ұлттық компания мен бөлімшесінің жемісті еңбегі мен жеңісіне мақтанышпен қарайтындай болуы тиіс. Бұл ретте бірнеше бағыт бойынша арнайы жұмыстарды қолға алдық. Межелеп отырған бірқатар жаңа жобаларымыз бар. Оның барлығы Тәуелсіздік мерекесі қарсаңында орын алатын болады. Ал дәл қазіргі күні теміржолшылар атынан мерекелік бильбордтар мен көрнекіліктер әзірлеудеміз. Мұның өзі тек теміржолшылар үшін ғана емес, қалалықтар мен шаһар жастары үшін де эстетикалық тұрғыдан тәрбиелік мәні бар шара екендігі анық, – дейді Семей жүк тасымалдау бөлімшесінің басшысы Марлен Кәрімұлы. Сонымен қатар, «ҚТЖ» ҰК» АҚ президенті жанындағы жастар ісі жөніндегі кеңестің Семей жол бөлімшесі бойынша аймақтық өкілі Ләззат Айтмұханованың жетекшілігімен бөлімшенің белсенді жастары да Тәуелсіздік күніне орай жаңа жоба әзірлеуде. Әзірге құпия саналатын бұл шара мерекеге арналған тарту көрінеді.

25 жылдыққа 25 игі іс

Басқа да жаңалықтар

«Қазақстан теміржолшысы» газетінің 2025 жылғы 8 мамырдағы арнайы саны