Теңіз тасымалынан табыс артқан
![](https://rail-news.kz/uploads/posts/2019/7/23/1563883067486.jpg)
«ҚТЖ-Жүк тасымалы» АҚ батыс өңіріндегі филиалдарының бірі – Маңғыстау жүк тасымалы бөлімшесі ағымдағы жылдың алты айын жоғары көрсеткіштермен аяқтап, жоспар үдесінен табылып отыр.
Айталық, жүк айналымы жоспарының орындалуы 106% құрап, 3135,8 млн ткм неттоға жетіп жығылған. Әсіресе, түбектік теміржолшыларды порт арқылы теңіз тасымалының артып отырғаны қуантады. Маңғыстау мұнайлы өлке ғана емес, қарт Каспийдің жағалауында орналасуы да осы өңірдегі бөлімшеге біраз артықшылыққа ие болуға мүмкіндік беріп отыр. Мұнда негізінен екі теңіз порты жұмыс істейді. Соның бірі Ақтау халықаралық теңіз портына бара қалсаңыз, ондағы «Ақ-Бидай», «Солтүстік» астық терминалдарының жұмысы қашан да қауырт екеніне куә болар едіңіз.
Мәселен, өткен алты ай ішінде «Солтүстік» терминалы бойынша 8191 астық тасымалдаушы құрамнан жүк түсіріліп, 141 кемеге 525,1 мың тонна астық тиеліп, жөнелтілген. Ал «Ақ-Бидай» терминалы бойынша 6152 астық тасымалдаушы құрамнан жүк түсіріліп, 420,5 мың тонна астық 109 кемеге тиеліп, шетел асқан. Ал былтыр осы уақытта 94 кемеге 413,6 мың тонна астық тиелген екен. «КаспианГлобал» терминалына келсек, бұл жерден 167 вагоннан жүк түсіріліпті. Бейнеу астық терминалы бойынша 59 вагоннан 3,8 мың тонна астық түсірілген. Сөйтіп, «Ақ-Бидай» және «Солтүстік» терминалдары бойынша барлығы 250 кемеге 945,6 мың тонна астық тиеліп жөнелтілген. Өткен жылға қарағанда биыл кеме саны 6 бірлікке артық болғанымен, астық көлемі 13,8 мың тонна кем екен.
«Транскаспийлік халықаралық көлік бағдары» бағдарламасын жүзеге асыру шеңберінде 2019 жылдың сәуір айынан бастап «Түркістан» фидерлік кемесінің арақатынасы қайта қалпына келтіріліп, сол кезден бастап бірінші шілдеге дейін 11 рет кеме қатынасы болып, онда барлығы 633 контейнер тиелген. Соның 443 контейнері ТХКБ желісі бойынша жөнелтілген.
Осы ретте, жүк тасымалдаудың қосымша көлемін тарту және компаниялардың кірісін арттыру, клиенттерге (жүк жөнелтушілерге, алушыларға) қызмет көрсету сервисі мен сапасын жақсарту бойынша тасымалға келе жатқан вагондардың жедел жылжуына бақылау белгіленген.
Теміржол көлігімен тасымалды жүзеге асыратын жүк қожайындарымен жүргізілген жұмыс нәтижесіне келсек, жүк тасымалдаудың қосымша көлемін тарту бағытында ауқымды жұмыстың атқарылғанын көреміз. Мәселен, бүгінде «Каспиан Карго Сервисез» кәсіпорны тарапынан ірі-габаритті емес жүктің арнайы транспортерларда 179 данасы 4 вагонға тиеліп, бөлек локомотивпен Ерсай станциясынан Құлсарыдағы «Теңізшевройл» компаниясының үшінші буынды зауытын салуға тасымалдана бастағанын көреміз. Сонымен қатар, Құлсары станциясынан TENGIZCHEVROIL пропан-бутанын Транскаспий халықаралық көлік бағдары Батуми портына дейін, сондай-ақ, Каспий теңізі арқылы Құрық портынан Грузияның Альят портына экспорттық маршруттардытасымалдау жоспарлануда.