Кесте бойынша жөнелтуді ұсынады
![](https://rail-news.kz/uploads/posts/2019/8/16/1565938157591.jpg)
Ақмола жүк тасымалы бөлімшесі экспортқа астықты бағдарлық жөнелту технологиясы есебінен вагондарды өңдеу уақытын шапшаңдатуды және жүк айналымын жақсартуды көздеп отыр.
Бөлімшенің өз клиенттеріне ұсынып отырған технологиясына келсек, ол бойынша жүк пойыздары діттеген жеріне сұрыптау станцияларында өңдеуден өтпей бекітілген кесте бойынша (жолаушы пойыздары секілді) жүріп бармақ. Осылайша, Сарыағаш, Құрық сынды шекаралық пункттерде вагондар тез сұрыпталып, құжаттамалар тез өңделетін болады. Ал бұл өз кезегінде, әртүрлі көлік түрлерін пайдалана отырып, мультимодалды тасымалды қамтамасыз етуге, Ақтау порты арқылы тұрақты фидерлік қатынасты, сондай-ақ, Транскаспий халықаралық көлік бағдарында сервисті қамтамасыз етуге оң әсерін тигізбек.
– Құжаттарды уақытылы ресімдеп, құрамдарды жасақтау үшін Ақмола бөлімшесінде оперативті диспетчерлік айналым ашылып отыр. Ақмола және Солтүстік Қазақстан облыстарының мемлекеттік аумақтық қызметтерімен бірлесе, астық және астық өнімдерін тиеп жөнелту, тасымалдау бойынша іс-әрекеттерді қамтамасыз ету және үйлестіру мәселелері бойынша штаб құрылды. Штаб отырысы күн сайын трейдерлердің қатысуымен өтіп тұрады, – деп ақпар берді «ҚТЖ-Жүк тасымалы» АҚ филиалы Ақмола жүк тасымалы бөлімшесі директорының орынбасары Ерлан Рахимжанов.
Осыған байланысты «Астық тобы» шұғыл орталығының жұмысы жаңартылған. Олардың басты міндеті – жүк жөнелтушілерден келіп түскен өтінімдердің ашық есебін жүргізу, жылжымалы құрамның уақытылы берілуіне, астық тасымалы жоспарының орындалуына, вагондардың қозғалысына, олардың жүк тиеу орындарындағы жұмысына бақылау жасау.
Осы ретте, атап өтерлігі, Ақмола жүк тасымалы бөлімшесі экспортқа астықты және астық өнімдерін жөнелту бойынша көшбасшы болып отыр. Қазіргі кезде 123 элеватордың жаңа егін астығын қабылдауға 68-і дайын тұр.