Нұр-Сұлтан станциясы қауіпсіздік күзетінде
![](https://rail-news.kz/uploads/posts/2019/8/21/1566383402147.jpg)
Нұр-Сұлтан станциясында жылжымалы құрамның адам мен мал басуы оқиғаларының алдын алу, профилактикасы бойынша биыл жыл басынан бері талай жұмыстар жүргізілді.
Станцияның қауіпсіздік бойынша бас маманы Маржан Айтмағанбетованың айтуынша, аталған мерзім ішінде № 21, 26, 36, 49, 61 мектептер мен колледждерде темір жол маңайында жүргенде қауіпсіздік ережелерін түсіндіру бойынша 1531 адам қатысқан 10 кездесу өткізген. Сонымен қатар мал жаю ережелерімен жолға жақын елдімекендерде 12 рет кездесу ұйымдастырылып, оған 236 тұрғын қатысқан. Темір жолға жақын жүргенде сақтайтын ережелер жадынамасы 407 адамға таратылған.
– Жыл басынан бері желілік тәртіп сақшылары, ӘТЖК, ТЧЭ11, ЛВЧДР-9 мекемелерімен бірлесе 14 рейд өткіздік. Соның барысында темір жолдан өту ережесі бұзылған 51 ескертпе берілді. Осы мерзім ішінде станция жұмысшыларымен 7 техникалық сабақ өткізіліп, оларға ҚР бойынша қайғылы жағдайлар туралы ақпараттар берілді, қауіпсіздік белгілерінің болуы мен станция парктерінің жарықтандырылуы бойынша тексерулер ұдайы жүргізіліп отырады,– дейді Маржан Айтмағанбетова.
Оның айтуынша, теміржол аймағының қауіптілігі туралы 11 белгі жаңартылып, қосымша 13 белгі қойылған. Жолаушылар өткелі, қызметтік жолдар, жолаушылар платформасы талапқа сай, парктің жарықтандырылу сапасы түнгі уақытта арнайы люксметрмен тексеріледі. Қажет болғанда оларды жаңартуға тапсырма беріледі. Бұған қоса малға қарсы қоршаудың баржоғына, жолаушылар өткеліне, станция шекарасында ескерту белгілерінің болуына 7 рет тексеру жүргізілген, 1 ескерту беріліп, олқылықтың орны дереу толтырылған. Сонымен қоса темір жол арқылы адамдар көп жүретін жерлерде дауыс зорайтқыш байланыстың жарамды болуы да басты назарда. Бұл бойынша 8 тексеру болған, кемшіліктер дер кезінде жойылған. Станция кезекшілері дауыс зорайтқыш байланыс арқылы белгіленбеген жерлерден темір жолды кесіп өтудің аса қауіпті екенін, пойыздардың келуі мен кетуін, маневрлік жұмыстардың жүріп жатқанын ұдайы хабарлап отырады.
Нұр-Сұлтан станциясы бойынша бөгде адамдардың қауіпсіздігі мен пойыздар қозғалысына қауіп төндіретін бірнеше телім бар. Мамандар адамдардың толассыз ағыны әсіресе, станцияның тақ паркі арқылы К. Кемеңгерұлы көшесі жағынан вокзалға қарай және станцияның сұрыптау паркі арқылы Ақжол көшесі жағынан вокзалға қарай, станцияның дөңес алды паркі арқылы «Лесозавод» шағын ауданынан Республика даңғылына қарай көп екенін айтады. Сонымен бірге автокөліктер жолымен түйісетін 804 км және 805 км-дегі өткелдер бойынша да адам ағыны көп.