Достық станциясында техникалық кабинет ашылды

«ҚТЖ-Жүк тасымалы» АҚ – Достық станциясы филиалының ұжымы жақында өз күштерімен жаңа техникалық кабинет жасақтап, қызметкерлердің білімін жетілдіру мүмкіндіктерін кеңейтті.

Станцияның өндірістік қауіпсіздік және экология секторының бастығы Батыржан Ахметжановтың айтуынша, бұрын техникалық персоналды оқыту үшін техникалық сабақтар жоспарлау залында өткізіліп келді. Енді, міне, өз қолдарымен жасақталған жаңа кабинет станция макеттерімен, плакаттар және көрнекі құралдармен жабдықталды.

– Әлемдік және отандық тәжірибе қозғалыс қауіпсіздігінің бұзылуы мен темір жол көлігіндегі қайғылы жағдайлардың 60 пайызы техникалық персоналдың кесірінен болатынын көрсетті. Мұның бәрі қауіпсіздік бойынша мәселелерде кәсіби дайындықтың төмендігі, төтенше жағдайларға дайын болмау, маманның техникалық қауіпсіздікті сақтауға деген ұстанымдарының әлсіздігі, адамдардың дағдарыс жағдайына жиі түсуі, жеке психикалық ерекшеліктері, атап айтқанда, жүйке жүйесінің бұзылуы, өзін-өзі бақылаудың деңгейі, өз іс әрекетіне талдау жүргізу мен оның салдары, коммуникативтік қабілеттерге байланысты туындайды, – дейді Б.Ахметжанов.

Расында өндірістік қауіпсіздік деңгейі мен оның салдарының салмағы, әрбір нақты өндірістік жағдайдың тәуекел деңгейі факторлар кешеніне байланысты болады, сондай факторлардың бірі – жұмысшылардың кәсіби дайындығының деңгейі. Сондықтан оларды оқытудағы басты міндеттердің бірі – қызметкерлерді апатты жағдайда дұрыс шешім қабылдай білуге үйрету. Оқыту барысында апатты жағдайлар мысал етіле отырып, қызметкерлерге сондай оқиғалардың бірнеше нұсқалары туралы мәліметтер беріледі. Ондай апаттар ұжым болып талқыланып, талданып, себептері зерттеледі. Оны талдау үшін де теміржолшыға мықты тәжірибе керек. Осындай оқыту жұмыстарының нәтижесінде жұмысшылар сын сағаттарда жағдайдан шыға алуға бағытталған «бағдарлама» жасауды үйренеді. Техникалық кабинетте аталған шараларды өткізуге барлық керекті жабдықтар алынған. Заманауи оқыту құралдарымен жарақталған кабинет білімін жетілдірушілер үшін жайлы әрі жарық.

Өндірістік қауіпсіздік және экология секторы бастығының айтуынша, жұмысшыларды оқыту бірнеше түрде жүзеге асырылады. Атап айтқанда, іскерлік ойындар, қайтадан келген бұйрықтар, нұсқаулықтар, факсограммаларды зерттеп, оқу, еңбек қорғау бойынша білім алу және тест тапсыру, станция жұмысшыларының еңбек қызметі үдерісінде туындаған жағдайларды талдап, тарқату сынды шаралар өткізіледі.