Жаңа жоба: вокзалдарға турникеттер орнатылмақ

«Жамбыл – адалдық алаңы» жобасы темір жол саласындағы құқық бұзушылықтардың алдын алу мақсатында вокзалдарға турникеттер орнату мәселесіне орай жаңа жобаны қолға алмақ. Аталған жоспар «Адал жол» жобалық кеңсесімен, «ҚТЖ» ҰК» АҚ және Бас көлік прокуратурасымен келісілмек.

Темір жол саласындағы құқық бұзушылықтардың алдын алу мақсатында еліміздегі жолаушылар тасымалдау жүйесіне бірқатар өзгерістер енгізу көзделуде.

ҚР Индустрия және инфрақұрылымдық даму министрлігі тарапынан бекітілуі тиіс «Темір жол көлігімен жолаушылар тасымалдау жүйесін жетілдіру бойынша жоспар» жобасына сәйкес, вокзалдарда турникеттер орнату арқылы шығарып салушылардың перронға өтуін шектеу нормалары енгізілмек, яғни перронға негізінен билеті бар жолаушылардың ғана өту құқығы болмақ.

Осы орайда, жоба авторлары жұртшылық пікірінің маңыздылығын ескере отырып, көрсетілген өзгерісті енгізу жөнінде көпшіліктің ой-пікірлері мен ұсыныстілектерін білдірулерін сұрайды. Бұл туралы халықтың пікірін жоба қызметкерлері әлеуметтік желілер мен халық арасында сауалнама жүргізу арқылы жинақтауда.

Айта кету керек, пікірлердің ішінен жобаға қарсы адамдардың қарасы көптігін бірден аңғаруға болады. Мәселен, Замира Хасенова:

«Бұл дұрыс емес! Балалары және ауыр сөмкесі бар жолаушы қайтпек? Пойыз бірінші жолаққа тоқтаса мейлі, ал екінші жолақта тұрса ше? Бұл мәселені шешеді деп ойламаймын, керісінше жолаушыларға қиындық тудырады» дейді.

«Тым асыра сілтеу сияқты. Билеті барлар ғана перронға шыққаннан жемқорлық азая қояды дегенге сену қиын және негізсіз деп ойлаймын» депті Бахтияр Бекназаров.

Taлғат Тілеукеев болса: «Жемқорлықты жоямыз деп жүріп адамгершілікті жойып алмайық. Мен қарсымын. Кейде таныс-туысымыз Тараз станциясы арқылы өтіп бара жатады. Мысалы, Қызылордадан Нұр-Сұлтанға. Сәлем беріп, қолынан ала алмаймыз ба сонда?» десе, Уали Болатбек:«Дұрыс емес. Әлемнің барлық мемлекетінде шығарып салу, күтіп алу процестері бар» деп уәж айтады.

Әрине, қандай шешім қабылданса да, халық ереже мен талапқа бағынып, орындайтыны хақ. Алайда, ол күшіне енбей тұрып, халыққа тиімді тұстарына баса мән беріліп, жолуашылар пікірі ескерілсе, нұр үстіне нұр.