Бас инженерлер біліктілігін байқатты

Бас инженер – өндірістің негізгі қозғаушы күші болып табылады. Сондықтан оларға қойылар талап пен жауапкершілік жоғары. Бұл әсіресе, Қазақстан темір жолы сынды сан тармақты өндірістік салада өте маңызды фактор. Жуырда Ақтөбе қаласында Батыс өңіріндегі Ақтөбе, Атырау, Орал, Маңғыстау жүк тасымалы бөлімшелерінің бас инженерлері аттестациядан өтіп, білім-біліктерін байқатты.

Бас инженерлерді аттестациялаудағы мақсат – бұл лауазымдық қызметтегі мамандардың кәсіби біліктілігі мен білім деңгейін анықтау және де лауазымдық міндетіне қаншалықты сәйкес келетінін анықтау болды, яғни өндіріске жауапты тұлғаларға тағы бір сынақ деген сөз.

Аттестациялау бірнеше кезеңді қамтыды. Бас инженерлер бірінші кезекте арнайы көшпелі комиссия мүшелерімен ауызша әңгімелесуден өтіп, жазбаша тест тапсырды. Бірнеше күн бойы «ҚТЖ-Жүк тасымалы» АҚ-на қарасты филиалдардың, станциялардың бас инженерлері, сонымен қатар вагон және локомотив пайдалану деполары бастықтарының орынбасарлары өз тәжірибелері мен білімдерін ортаға салып, өздерін жанжақты таныстыруы шарт еді. Себебі, аттестацияның нәтижесі әрбір қызметкердің біліктілігін арттыруды ескере отырып, оның құзыреттілігін дамытуға жеке жоспар құруға, семинар, тренингтерге қатысуға, тағылымдамадан өтіп, кеңес алуға негіз болмақ.

Бұған дейін бас инженерлерді аттестациялау Нұр-Сұлтан және Алматы қалаларында өтсе, жақын күндері Павлодар, Шымкент қалаларында өтеді деп жоспарланып отырған көрінеді. Сайып келгенде, күтілетін нәтиже – өндірістегі шешуші тұлғалар болып табылатын бас инженерлер жауаптылығы мен имиджін арттыру арқылы саланың техникалық дамуына жағдай жасау екені анық.