Қорытынды көңілден шықты

 Нұр-Сұлтан станциясында биыл 16 қыркүйек пен 2 қазан аралығында өткен күзгі комиссиялық тексеру жұмыстары қорытындыланды.

Станцияның техникалық бөлімінің бастығы Дамир Берікқазиновтың айтуынша, байқау барысында комиссия құрамы қозғалыс қауіпсіздігі, еңбек қорғау, техникалық құралдар жағдайы мен «ҚТЖ-Жүк тасымалы» АҚ филиалы – Ақмола ЖТ бөлімшесінің жылжымалы құрамы мен негізгі қорын қолдану реті тексеруге алынған.

Қозғалыс шаруашылығы бойынша станцияда жүргізілген ревизия нәтижесіне сай басшылық тарапынан жұмысшылар арасында профилактикалық шаралар өткізу жөнінен бірқатар міндетті бақылау қойылды. Білімдерін тексерудегі сауалнама кезінде станция басшылары мен қызметкерлері қозғалыс қауіпсіздігін қамтамасыз етумен байланысты локальды актілер мен құқықтық-нормативтік актілер талаптары туралы білімдері жақсы екенін көрсеткен. Бөлім бастығының мәлімдеуінше, станция бойынша техникалық құралдарды күтіп ұстау, пайдаланудың технологиялық үдерістерін орындау, нормативтік техникалық құжаттардың болуы және өзектілігі, НТҚ идентификациясы мен тиімділігі және оны жүргізу тәртібін сақтау өз деңгейінде атқарылуда.

– Бұл комиссиялық тексеру барысында сонымен қатар қызметтік нұсқаулықтың орындалуы, «Тыйым салынған белгіден өту – қылмыс», «Еңбек қауіпсіздігі бойынша ерекше жұмыс тәртібі» атты айлықтарды өткізу тиімділігі, пойыздардың қозғалыс қауіпсіздігін қамтамасыз ету бойынша жұмыстарды ұйымдастыруды мақсатты тексеру барысында анықталған кемшіліктерге жол бермеу үшін қабылданған шаралардың орындалысы да тексерілді, – дейді бөлім бастығы. Станцияның басшылық құрамы жұмысшылардың қызметтік міндеттерін орындауы мен қозғалыс қауіпсіздігін қамтамасыз етуге жеке қатысу нормативтері де өз дәрежесінде атқарылуда. Жалпы алғанда, байқау қорытындысы көңілден шығып отыр.