Апаттың алдын алды
Ақтөбе облысы бойынша меншікті тілші
Қозғалыс қауіпсіздігі ережесінің бұзылуына жол бермеген өткел кезекшісі Асқар Ердекешовтің қырағы әрекеті апаттың алдын алды.
Жуырда Ақтөбедегі магистральдық желі бөлімшесінде қозғалып бара жатқан №3508 жүк пойызы вагонынан кемшілікті анықтаған өткел кезекшісімен кездесу өтіп, тәжірибелі маманға құрмет көрсетілді.
Оқиға 15 қазанда күзетке алынған өткелде болған. №38 разъездің 1753 шақырымында №3508 жүк пойызы тоқтатылды. Өткел кезекшісі пойызды шығарып салып тұрған кезінде 37 вагоннан түтін шығып бара жатқанын көрген. Жағдайды бірден разъезд кезекшісіне хабарлап, пойыз тоқтатылып, ағытуға ұсыныс беріледі.
«Әр бөлімшеде қозғалыс қауіпсіздігіне үлкен көңіл бөлінеді. Жылжымалы құрамға техникалық қызмет көрсету кезінде вагон қараушылар доңғалақтағы қауіпті жарықшақты, вагон тіркемесіндегі құйма құрылғының ақауын анықтады. Жылжымалы құрам үздіксіз қозғалыста болғандықтан қауіпсіздікті үнемі бақылауда ұстап отырамыз. Өткел кезекшісінің ақауды анықтауы бір бұл емес. Осындай мамандарымызға алғысымызды айтып, ынталандырып отыру – парызымыз», – деді Магистральдық желі бөлімшесінің директоры Серғали Жайлаубай.
Өткел кезекшісін Алғыс хатпен марапаттап, бағалы сыйлық табыс еткен басшылық жоғары жаққа наградаға ұсынуға ұсыныс жіберді. Мамандар пікірінше, егер ақау дер кезінде анықталмаса, дөңгелек қозғалмай қызып, рельсті сындырып жіберуі немесе өзі сынып, вагонның аударылып кетуі әбден мүмкін еді. Ақауды анықтаған өткел кезекшісі Асқар Ердекешовтің теміржолда 26 жылдан бері еңбек етіп келеді.
«Қауіпсіздік – біз үшін басты талап. Қозғалып бара жатқан жүк вагонынан вагоннан түтін шығып жатқанын байқап, бірден хабар бердім. Марапат алғаныма емес, алдымен қауіпсіздікке үлес қосып, апаттың алдын алғаныма қуаныштымын», – деді 52 жастағы маман.