Транзит тасымалының тиімді жолы
Қытайдың Чэнду қаласында China (Chengdu) International Supply Chain and Smart Logistics Expo (SCSL 2019) көліктіклогистикалық қызметтерінің ең ірі халықаралық мамандандырылған көрмесі өтуде.
Әлемнің 12 мемлекетінен 10нан астам теміржол әкімшілігі мен 190-нан астам экспонент қатысып жатқан бұл шарада Қазақстан темір жолы тарапынан ҚХР-дағы және Оңтүстік Шығыс Азия елдеріндегі «ҚТЖ-Жүк тасымалы» АҚ өкілдігі көрмеге өз стендін ұсынды.
Көрме шеңберінде Чэнду, Чунцин, Ганьчжоу қалаларының қытайлық логистикалық платформалар жетекшілерімен, сондай-ақ, Иран теміржолдары өкілдерімен Өзбекстан және Түркіменстан аумағы арқылы құрғақжол бағдарын дамыту бойынша келіссөздер жүргізілді.
«Қытай – Қазақстан – Түркіменстан – Иран бағдарының жалпы ұзындығы шамамен 10 мың шақырымды құрайды. Жолдағы жалпы уақыт бар-жоғы 2 апта шамасын құрайды, бұл 25-30 тәуліктей уақыт кететін теңіз жолына қарағанда екі есе жылдам. Қытай – Қазақстан – Түркіменстан – Иран теміржол бағыты Шығыс Қытай жағалауынан Парсы шығанағы нарығына жүк жеткізудің алғашқы логистикалық шешімі болып табылады», – деп атап өтті өкілдіктің басшысы Ерік Әубәкіров.
Түркіменстан бойынша жеткізушілердің және тасымалдаушылардың қажеттіліктеріне сүйене отырып, Серхетяктан Серахске дейін, Иранмен оңтүстік-шығыс шекараға дейін немесе Акяйлге дейін және одан әрмен Иранның солтүстігіне қарай екі бағыт қарастырылған. Аталған көліктранзиттік дәлізін құру ҚазақстанТүркіменстан-Иран халықаралық темір жолын салғаннан кейін мүмкін болды.
Сондай-ақ, кездесу барысында Қытай-Еуропа-Қытай бағыты бойынша және Транскаспий дәлізі бойынша Қазақстан аумағы арқылы транзитпен жүк және контейнерлік тасымалдаудың ағымдағы жағдайы мен жоспарлары, жаңа бағдарларды дамыту мәселелері талқыланды.