Көк тудың желбірегені
Қызылорда станциясының теміржол вокзалы ғимаратының төріне Мемлекеттік рәміздердің бірі – Ту тігілді. Қала тұрғындарының бойына патриоттық рух ұялатып, жолаушылардың болмысына отансүйгіштік сенімін тереңдету мақсатында қолға алынған шараға партияның «Теміржол» филиалы белсенділері мұрындық болды.
«Менің Туым – менің Отаным» акциясы аясында өткізілген шараға арнайы шақырылған Қызылорда ЖТ бөлімшесінің директоры Аманкелді Арысбаев пен Магистральдық желі бөлімшесінің бастығы Ибраким Басықараев пен теміржолшылар қатысып, көк туды мәртебелі тұғырға орналастыру рәсіміне куә болды. – Мемлекеттік тудың маңызын насихаттап, жастарды отансүйгіштікке баулу мақсатында өткен патриоттық шара акциясына нұротандық теміржолшылар да қолдау білдірді. «Nur Otan» партиясының өкілдері мен теміржолшы жастар қаланың бас қақпасы саналатын теміржол вокзалы ғимаратында әнұранды шырқап, маңдайшасына көк туды желбіретті, – деді партияның «Теміржол» филиалы төрағасының орынбасары Базара Танбаева.
Салтанатты жиын барысында сөз алғандар мемлекеттік рәміздің қасиеті мен мән-маңызын түсіндіретін, азаматтардың рухы мен жігерін оятатын келелі ойлар айтып, елдік мұраттың биік болып, көк тудың мәртебесі қай уақытта да асқақтай берсін деген тілектерімен бөлісті.
«Мемлекеттік Туды қастерлеу, қадір тұту – әр қазақстандықтың парызы» деген «Жас Отан» жастар қанатының жалынды жастары да мерекенің ажарын ашып, жастарды игі бастамалардың ұйытқысы болуға шақырды.