Оқу-жаттығуға қатысты
Маңғыстау теміржолының төтенше жағдайда жедел әрекет етуге арналған арнайы қызметтері «Қыс-2019» республикалық командалық-штабтық оқу-жаттығуының тапсырмасын ойдағыдай орындап, кез келген оқыс жағдайдан шығуға дайындықтарын көрсетті.
Оқу-жаттығу 5-6 қараша күндері өтті. 5 қараша таңғы сағат 8:00 облыстық төтенше жағдайлар департаментінің жедел кезекшілігінен «Дабыл-1001» белгісі беріліп, әкімдік тарапынан төтенше жағдайлардың алдын алу және жою бойынша іс-қимылдарды ұйымдастыру, басқару органдары, азаматтық қорғау қызметтерінің құрамдары мен техникалары тік көтерілді. Бас штаб Маңғыстау облыстық төтенше жағдайлар департаментінде, екіншісі «ҚТЖЖүк тасымалы» АҚ – Маңғыстау жүк тасымалы бөлімшесінің ғимаратында орналасты. Оны бөлімшенің бас инженері Қарақат Жақанов басқарып, теміржолдың салалық қызметінен 30 шақты адам қатысты. Іс-шара шартты түрде жүргізілді. Мақсаты – штабқа келіп түскен тапсырмаларды тез арада талдап, жұмысты ұйымдастыру, яғни апаттық жағдайларда теміржолдағы қажетті техникалардың дайындығын, іс-қимылын пысықтау.
− Оқу-жаттығуға өрт сөндіру және қалпына келтіру пойыздары шығарылған жоқ. Бірақ техникалар толығымен дайындыққа келтірілді. Өрт сөндіру пойызы бойынша 13, қалпына келтіру пойызынан 20 адам қатысты. Олар Маңғыстау өрт сөндіру пойызының бастығы Амантай Гүлжиков пен қалпына келтіру пойызы бастығының міндетін атқарушы Ербол Мүсірхановтың басшылығымен жұмыс істеді. Жалпы, осы екі күнде облыс бойынша бірнеше рет дабыл берілді. Оның ішінде екеуі теміржолға қатысты болды. Бірінші жаттығу 6 қараша сағат 10:00 Шетпе станциясында теміржолды қар басу салдарынан жүк пойызынан хлор тиелген алты цистерна жолдан шығып кетуге байланысты болды. Салдарынан 100 метр теміржол бұзылып, пойыздар қозғалысы тоқтап қалады. Станция халқының хлормен улану қаупі туып, 3 адам зардап шекті. Екіншісінде Сай-Өтес – Маңғыстау телімі, Шетпе-№14 бекет аралығында теміржолды су басып, екі жүк вагоны жолдан шықты. 100 метр теміржолға зақым келді. Зардап шегушілер болған жоқ. – Аталған тапсырмалар толықтай және уақытылы орындалды, теміржолшылар дайындығына сын болған жоқ, – дейді «ҚТЖ» ҰК» АҚ мемлекеттік емес өртке қарсы қызметі Маңғыстау жасағы бастығының міндетін атқарушы Арыслан Таласов.