Үздік жүздік қатарында
Әке жолын жалғап, темір жол саласында қызмет етіп жүрген Еркебұлан Аяғанов он жылдан артық уақыт темір жолда абыройлы еңбек етіп, талай белестерді бағындыруда. Жақында ол өз саласындағы қызметкерлер арасында ұйымдастырылған «100 жас есім» байқауында үздік жүздіктің қатарынан табылды. Бүгінде ол Сексеуіл локомотив пайдалану депосы бастығының өндіріс жөніндегі орынбасары.
Әкесі Бауыржан Аяғанов та талай жылдар темір жолда қызмет етіп, халық алғысына бөленді. Әке болмысы Еркебұланның болашақ мамандығын қалыптастыруға ықпал етті. Бала кезден темір жолдың темірдей тәртібі, қиындығы мен жауапкершілігіне қанық болса да, өзінің болашағын осы саламен ғана байланыстырды. – 2007 жылы Сексеуіл локомотив пайдалану депосына тепловоз жөндеуші болып еңбек жолымды бастадым. Ауысым шебері, инженер, аға шебер, қозғалыс қауіпсіздігі қызметінің бас маманы сынды қызметтерді атқардым. Темір жол – жауапкершілігі мол саланың бірі. Сонысымен тәртіпті де талап етеді. Жұмысшылардың уақытылы жұмысқа келуі, сапалы киімдермен қамтылуы, Сексеуіл станциясы арқылы өтетін пойыздардың уақытылы қабылдануы мен жөнелтілуі, қауіпсіздіктің сақталуы, қызметтік тәртіпті қадағалау аса жауапкершілікті қажет ететін міндетті жұмыс болып табылады, – дейді Еркебұлан. Ізденімпаз теміржолшы әркез жетістіктерге жетуге ұмтылып отырады. Оның алған мақтау қағаздары мен Құрмет грамоталары, Алғыс хаттары жетерлік. Таяу күнде ғана мәртебесі тағы бір сатыға көтерілді. – Алғашқыда құжаттар тапсырдым. Көп уақыт өтпей-ақ, елордадан байқаудың арнайы комиссия мүшелері келіп, сұхбат жүргізді. Еліміздің түкпір-түкпірінен қатысушылар көп болды. Облыс бойынша 10 адамның арасынан 5 адам іріктеліп алынды. Жеңімпаздардың ішінде өзімнің есімімді көргенде төбем көкке жеткендей болды. Бұл – бір ғана менің жетістігім емес, жанымда қолдаушым болып жүрген жақындарым мен қызметіне жауаптылықпен қарайтын әріптестерімнің де үлкен үлесімен келген жетістік, – дейді ол. Еркебұланың айтуынша, компания жастардың білімін жетілдіру мен тәжірибе алмасуына қолдау көрсетіп келеді. – Менің өткенім де, бүгінім де, келешегім де темір жолмен байланысты. Себебі сүйікті мамандығым ретінде өзімді осы салада ғана елестете аламын. Бүгінгі жетістіктерім де халықпен тығыз қатынастағы салада, елдің алғысы мен ыстық ықыласынан деп ойлаймын, – дейді Еркебұлан. Білімі мен білігін ұштастырып, абыройлы қызмет еткен адамның мерейі әрқашан да биік.