Темір жолға кедергі жасама...
Шымкент қаласы бойынша меншікті тілшісі
«Темір жол – өте қауіпті аймақ» деп жазыла-жазыла жауыр болса да қайталап айтудан теміржолшылар да жалығар емес. Өйткені, мамандардың пікірінше, егер жергілікті тұрғындар пойыздар қозғалысына сырттан қауіп төндірмесе, теміржолда апаттар азаяр еді.
Теміржолдың төңірегіндегі халық қауіпқатерді қанша ескертсе де құлақ асар емес, өз өмірлерімен қатар-қатар пойыздар қозғалысына да айтарлықтай қауіп төндіруде. Қаншама адам жылжымалы құрамның астына түсіп, өлім құшуда. Мәселен, жыл басынан бері Шымкент жүк тасымалы бойынша аймақта 13 оқиға орын алған. Оның екеуі – суицид, қалғаны абайсызда болған жол апаттары. Яғни, адамдардың өз өміріне немқұрайлы қарап, теміржолдың қауіпті екендігін әлі де жете аңғара бермейтінін көрсетеді.
«Егер адамдар мұнша жауапсыздық танытпаса, осы аталған жағдайларды болдырмауға болар еді. Біз станция қызметкерлері және жол полициясымен бірігіп түсінік жұмыстарын жүргізудегі мақсатымыз да осы. Қозғалыс қауіпсіздігін сақтау бағытындағы түйінді мәселелерді бірлесе шешіп, оңтайлы жолдарын топтаса іздестіруге тырысамыз. Осы ретте, әр адам өз өміріне өзі жауапты болса және жайылымда жүрген малына ие болса, әсіресе, шағын станциялар мен разъездерде тұратын адамдар, әрбір көлік жүргізушісі «асықпаған алысқа жетеді» деген қағиданы ұстанып, жолда мұқият болса, кез келген жол-көлік оқиғасының алдын алуға бола ма? Әрине, болады! Ата-аналар мен мектеп мұғалімдері теміржолдың бойы ойын алаңы емес екенін балаларға айта-айта құлағына сіңіруі керек. Одан қалды мектептерде жол қауіпсіздігі тақырыбына арналған тәрбие сағаттары, семинарлар қашан балалар санасына сіңіргенше өткізіле бергені жөн. Қысқасы, темір жолға кедергі жасамаса», – дейді Шымкент станциясының еңбек қорғау жөніндегі жетекші инженері Гүлжайна Талғатқызы.
Теміржол саласының мамандары, сонымен қатар темір жолдың бойына төрт түлігін қараусыз жайып жіберетіндерден де үлкен қауіп төніп тұрғанын жоққа шығармайды. Оларға теміржол бойына 200 метрге дейін жақын жерге малды тек арқандап жаюға болатыны, ал 200 метрге таяу болса, міндетті түрде қасында малды қарап жүрген бағушысы болуы тиіс екені талай рет айтып түсіндірілсе де осы талапты орындамай, теміржол қауіпсіздігіне қасақана қауіп төндіреді. Ондайлар міндетті түрде қылмыстық жауапқа тартылады. Өйткені, осындай жауапсыздықтар кесірі әртүрлі жол апаттарына, тіпті пойыздардың аударылып кетуіне соқтыруы әбден мүмкін.