HR академиясын дамытуда
Биыл қараша айында «ҚТЖ» ҰК» АҚ басқарма төрағасының корпоративтік мәселелер және HR жөніндегі орынбасары Серік Әбденов HR Академиясы тұжырымдамасын бекіткен еді. Соған байланысты компанияның Темір жол көлігіндегі персоналды дамыту және бағалау орталығында осы саладағы мамандарды оқыту жұмыстары жүзеге асырылуда.
HR Академиясы тұжырымдамасын енгізудегі басты мақсат – тиімді HR команда құру, кадрлық әкімшіліктен бизнес үшін анағұрлым құндырақ үдерістерге назар аудару, HR сараптамасын жаңарту. HR академияны құру ішкі ресурстар есебімен жүзеге асырылады. Оларды жылына 20-30 адамнан тұратын екі топ арқылы оқыту көзделуде. Бағдарлама 1-3 күнге созылатын модульдерден тұрады. Алғашқы модуль аталған орталықта биыл 12-14 желтоқсан аралығында өткізілді. Оған барлығы 26 қызметкер қатысқан. Бұл қызметкерлер барлық өңірдегі кадр бөлімдерінен іріктеліп алыныпты. Бүгінгі таңда компания тобында 1200-ге жуық HR қызметкер бар. Оларды аталған модульге іріктеу кезінде жеке тұлғалық және іскерлік қасиеттеріне барынша назар аударылған. Атап айтқанда, ондай негізгі тұлғалық-іскерлік қасиеттерге мамандардың тұлғалық әлеуеті, білім деңгейі, тіл табыса білу қабілеті мен бастамашылдығы жатады. Қатысушылар модуль тақырыбына сай HR негіздері, рекрутинг негіздері және біліктілігі жөнінен сұхбат деген бөлімдер бойынша білім алды. Оларды оқыту барысында теориялық базаның жартысы өз бетімен білім алуға бағытталып, ал ішкі тренингтерде теорияға да, тәжірибеге де көңіл бөлінеді. Өз бетінше білім алу дегеніміз – кітаптар, корпоративтік стандарт, онлайн курстар, ұсынылған әдебиеттер тізімі бойынша білім. Күндізгі оқу барысында НR сараптама дамуы мен HR үшін маңызды біліктіліктер қиылыстыра отырып үйретіледі.
Бірінші күнгі дәрісті компанияның Адами ресурстарды басқару департаментінің директоры Тамила Микулич оқыды. Қалған күндерде Темір жол көлігіндегі персоналды дамыту және бағалау орталығының бас менеджері, рекрутер Ұлан Маханбетов дәріс берді. Сонымен қатар жаттықтырушылар командасының құрамында Адами ресурстарды басқару департаментінің бас менеджері Ақмарал Байғабылова, Саян Сыздықов, Айсұлу Үрімбаева, Мадина Тәшенова, Замир Серіков, Асқар Насыров және тағы басқалары бар.