Маңғыстауда танымдық дәріс өтті
Маңғыстау жүк тасымалы бөлімшесінде «Діни білім: экстремизм мен терроризмнің алдын алу» тақырыбында кездесу болып өтті. Онда облыстағы дін саласы мамандары түбек теміржолшыларымен кездесті.
Жиынға Маңғыстау станциясында орналасқан теміржол мекемелерінің басшылығы мен қызметкерлері қатысты. Маңғыстау станциясы орналасқан Мұнайлы ауданының ішкі саясат және тілдерді дамыту бөлімінің ұйымдастыруымен өткен шарада Маңғыстау облыстық дін істері басқармасының теологы Нұрбек Жолдасбайұлы мен Айнаш Төлепова және Мұнайлы аудандық ішкі саясат және тілдерді дамыту бөлімінің маманы Ернар Жиенбаев теріс бағыттағы діни ағымдардың қоғамға келтірер залалы турасында әңгімелеп, тақырып аясында сөз етті.
− Аталған бағытта жұмыс жасау үшін ауданда құрылған ақпараттық-түсіндіру тобы биылғы жылға жоспарлаған жұмысын бастады. Сол үшін бүгін теміржолшылармен жүздесіп, ақпараттық түсіндіру жұмыстарымызды жүргізудеміз. Себебі теміржол да өте маңызды нысан. Жалпы, көтеріліп отырған тақырып – бүгінгі күннің өткір мәселесі. Сондықтан бұл кім-кімді де бей-жай қалдырмауға тиіс, – дейді ақпараттық топтың мүшесі Ернар Жиенбаев.
Кездесу соңы сұрақ-жауапқа ұласты. Теміржолшылар мамандарға көкейдегі сұрақтарын жолдап, тиісті жауабын алды.