Теолог теміржолшылармен кездесу өткізді
Абай облысы бойынша меншікті тілші
Жуырда ӘТЖК - Семей филиалы қызметкерлері үшін діни экстремизм мен терроризмнің алдын алу бойынша танымдық дәріс өткізілді. Іс-шара барысында дін істері мәселелерін зерттеу орталығының мамандары кең көлемде түсінік беріп, теміржолшылардың сауалдарына жауап берді.
Теолог мамандардың айтуынша, жалпы өңіріміздегі діни ахуал біршама тұрақты болғанымен келеңсіз жайттар да көрініс беруде. Атап айтсақ, жуырда ғана өндірістік аймақтан 16 млн теңгенің түсті металл қалдықтарын жымқырумен айналысқан топ қолға түскен, оның ішінде радикалды діни ағым өкілі де болған. Бұл жайт теміржол бойындағы қырағылықты да қалт жібермеу керектігін меңзейді.
Ал жат ағым өкілдерінің жүріс-тұрысы мен психологиясы, олардың күмәнді идеологиясы туралы теологтар арнайы дәріс өткізді. Теміржол бойындағы нысандар күзетіне ғана емес, қозғалыс қауіпсіздігіне де қатысы бар мамандар әсіресе экстремистік пиғылдағы күдікті азаматтарды анықтау туралы да мол мағлұмат ала алды.
Ақпараттық-насихаттық шара барысында ӘТЖК Семей филиалы қызметкерлері де түрлі сауалдар қойып, нақты жауаптар ала алды.
Жалпы, бүгінде Семей теміржолы бойынша «ҚР діни экстремизм және терроризмге қарсы іс-қимыл жөніндегі 2018-2022 жылдарға арналған мемлекеттік бағдарлама» талаптары аясында барлық вокзалдар ішінде лаңкестік қауіпке байланысты жадынамалар ілініп, «қауырт желі» телефон номерлері берілген.
Сол тәрізді террорлық әрекеттің алдын алу бойынша алдын ала хабарлау, қатер орын алған сын сағаттағы қызметкерлер әрекеті туралы ақпараттық-түсіндіру жұмыстары да белсенді жүргізіліп жатыр.