Бірқатар жобалар жүзеге асыруда
![](https://rail-news.kz/uploads/posts/2020/3/3/1583219033325.jpg)
Магистральдық желі дирекциясы 2020-2021 жылдар аралығында бірқатар жобаларды жүзеге асыруды жоспарлап отыр. Олар жүк тасымалы жағдайын жақсартуға бағытталған.
Айталық, Саяқ – Балқаш теліміндегі үш жекелеген пункттегі жолдарды ұзарту және екі жекелеген пунктті ашу жоспарланса, Достық – 19 разъезд аралығында екінші жолды және 19 разъезде үш қабылдап-жөнелту жолын салу көзделген.
Сонымен қатар Достық станциясында «Т» паркіндегі жүк қабылдап-жөнелту жолдарын ұзарту қарастырылып отыр. Сондай-ақ, ЭЦ-электрлік орталықтандыру қосынын жаңғырту, жаяу жүргіншілер өткелін салу, 1435 милиметрлік жол табаны бойынша қабылдап-жөнелту жолдарын жарықтандыру жоспарлы жұмыстар қатарынан болып отыр.
Бұл шаруаларды іске асыру үшін биыл тиісті жобалық-сметалық құжаттамалар әзірленетін болады. Дирекция алдында тұрған тағы бір маңызды міндет, ол 2020 жылы контейнерлік пойыздардың жылдамдығын тәулігіне 1150 шақырымға дейін көтеру. Осы мақсатта биыл Достық – Қарталы, Достық – Илецк, Алтынкөл – Илецк бағыттарында 338 км жолға күрделі жөндеу жүргізілмек. Ол осы жылға жоспарланған жылдық күрделі жөндеу көлемінің 68% құрайды.