Маңғыстау теміржолшылары емірліктермен кездесті
Жуырда Маңғыстау теміржолшылары мен желілік полиция бөлімшесінің қызметкерлері Емір ауылының тұрғындарымен кездесті.
Жергілікті халықпен кездесуге Маңғыстау магистральдық желі бөлімшесінің, Баянды ауылы әкімдігінің, Маңғыстау станциясындағы желілік полиция бөлімшесінің қызметкерлері қатысты. Олар ауылдың қарапайым тұрғындары мен шаруа қожалықтары иелерімен сөйлесіп, темір жолдан өту тәртібін түсіндіріп, мал жайғанда қандай ереже талаптарды сақтау керектігінен ақпар берді.
Тәртіпке бойсұнбаудың салдары қандай апатты жағдайларға алып келетінін және заңмен қадағаланып, жауапкершілікке тартылатыны туралы ескертті.
− №15-16 бекет, Тамақ-Маңғыстау cтанциясы аралықтарында тепловоз машинистерінің шұғыл тежеу беруі көбейіп кеткен. Сондықтан осы маңда тұратын тұрғындарға теміржол нысандарында мал-жанның қауіпсіздігін сақтау, теміржолдың арнайы өтпелерінен өтудің өз өмірлеріне қаншалықты маңызды екенін түсіндірудеміз, – дейді Маңғыстау станциясындағы желілік полиция бөлімшесі Әкімшілік полиция бөлімінің инспекторы Нұрлыбек Рахметов.