Халықтың ортасында өткен жиын

Маңғыстау теміржол вокзалында жолаушылармен ерекше кездесу өтті. Онда құзырлы орган өкілдері вокзалға келген халықтың сұрақтарына жауап берді. Түрлі салада түсінік беріп, қажет кеңестерін ұсынды.

Кездесуді ҚР «Жеке және заңды тұлғалардың өтініштерін қарау тәртібі туралы» Заң талаптарын орындау мақсатында Маңғыстау станциясындағы Желілік полиция бөлімшесі биылғы жылға арналған жоспарына сәйкес ұйымдастырды. Оған қатысып, жолаушыларды тыңдағандар қатарында «Жолаушылар тасымалы» АҚ Маңғыстау телімі бастығы Батырбек Чилимбаев, Маңғыстау магистральдық желі бөлімшесі директорының вокзал шаруашылығы бойынша орынбасары Рустам Тухтиев, Маңғыстау ст. ЖПб бастығы Еркебұлан Изкенов, көлік прокуратурасы мен «Нұр Отан» партиясының өкілі болды. «Вокзалға келген азаматтарды қабылдау барысында оларды жанжақты ақпараттандырудан бөлек, ұсыныс, өтініш-тілектерін де тыңдадық. Мәселен, біреу вокзал алаңын жарықтандыру керектігін алға тартты. Нұрлыбай Дарханов деген азамат теміржолдың арғы жағында орналасқан Дәулет ауылымен байланыстыратын теміржол үстінен көпір салу мәселесін көтерді. Қойлыбай есімді жігіт вокзалда халықтың жүгін тасуға жалданып жүргенін айтып, жұмыс сұрады. Мұндай мәселелердің бәрі назарға алынды, алдағы уақытта қажетті жерлерге жеткізетін боламыз», – дейді шараны ұйымдастырушылар.

Сондай-ақ сол күні №037 «Маңғыстау-Нұр-Сұлтан» бағытындағы жолаушылар пойызында да құқықтық, профилактикалық түсінік жұмыстары жүргізілді.