Халықаралық көрме – оңтүстікте

Жаңалықтар

01.11.2016, 12:54

Биыл екінші рет Шымқалада «Көлік, Логистика және Инфрақұрылым» – Silk Way Transport, Logistics & Infrastructure 2016 ІІ Халықаралық көрмесі өтті. Жобаны ұйымдастыруға ОҚО әкімдігі мен қатар ҚР Инвестициялар және даму министрлігі, ОҚО «Атамекен» Кәсіпкерлер палатасы, «Kazlogistics» көлік қызметкерлерінің одағы, ҚР Экспедиторларының Ұлттық қауымдастығы, Қазақстан тасымалдаушылары мен вагон операторларының қауымдастығы, «БК «Көлік-Логистикалық аумақ» қолдау көрсеткен. Көрмеде 20-дан астам көлік және логистикалық компаниялар өздерінің қызметтері мен жабдықтарын ұсынды. – Елбасы Н. Назарбаев Қазақстанның аумағы арқылы өтетін жүктің көлемін 2010 жылмен салыстырғанда 2020 жылға дейін он есе өсіру талабын қоюда. Ол үшін алдымен көліктік инфрақұрылымды дамыту қажет. «Нұрлы жол» бағдарламасы шеңберінде біздің облыста 16 бағдарлама іске асып келеді. Алдағы уақытта Қазақстан мен Өзбекстан шекара аумағында«Қорғас» халықаралық шекаралық сауда орталығы сынды логистикалық хаб ашылмақ, – деді ОҚО кәсіпкерлік, индустриалды-инновациялық даму және туризм басқармасының басшысы М.Қарабаев көрмеге қатысқан барлық кәсіп иелерімен болған басқосуда оларды бірлесе жұмыс істеуге шақырып. Келешекте Шымкентте көлемі 90 гектарға жуық Көліктік-логистикалық орталық ашылмақ. Осының шағын көшірмелеріне Сарыағаштан,Түркістаннан 20, Жетісайдан 10 гектардан жер бөлініп, құрылыс нысандары салынып жатыр. Ұйымдастырушылар көрмеге жиналғандарға осы орталықтардың салынып біткен қоймаларын тиімді пайдалануға кеңес берді. – Ресейлік бірқатар сауда орындарымен келісімге келіп, осы жазда үлкен жүкті тасымалдадық. Сонда Сарыағашта 4 күн бойы рефрижераторлық көлік таппай қиналдық. Басқа амал қалмаған соң, қырғызстандық осындай көлікті жалдауға тура келді.Сондықтан, рефрижераторлық көліктердің тасымалдануын кәсіби деңгейге жеткізу керек. Себебі, біздің облыста жыл сайын 3,500 млн тонна ауыл шаруашылық өнімі өндіріледі. Қазіргі уақытта біз бар болғаны 200-300 мың тоннасын ғана сыртқа тасымалдаймыз. Өңірдегі көліктік- логистикалық құрылымның дамымауынан қаншама өнімді сыртқы елдерге жеткізе алмаймыз. Ал, Ресей сыртқа елдерден келген тауардың сапасына аса көңіл бөледі. Көршілер өнімнің қандай температуралық режимде келгеніне, қанша күнге шыдас беретініне дейін сараптап отырады. Жерлес дихандардың еңбегі еш кетіп жатыр. Егер шет елдерге өнімді жеткізу сапалы жүзеге асса, жылына 10 млн тонна тауар тасымалдауға болар еді. Сондықтан, осында отырған көлік компанияларының иелеріне Сарыағаш, Мақтаарал сынды бақша дақылдары көп өсетін ауданның диханшылармен жұмыс істеуге шақырар едім, – деді «Басқарушы компаниясы «Көлік – логистикалық аймақ» ЖШС Бас директорының орынбасары М.Телғозы. Айта кетейік, Оңтүстік Қазақстан облысы қай жағынан алсаңыз да көліктік инфрақұрылымды дамытуға қолайлы өңір. Аймақ «Батыс-Еуропа – Батыс -Қытай» халықаралық автобаны мен «Шымкент – Самара» тас жолының бойында жатқандықтан көлік қозғалысы толастамайды. Өңір басшылары осы мүмкіндікті пайдаланып, сауда-логистикалық орталықтар ашу арқылы, көліктік инфрақұрылымды дамытуға күш салуда.

Халықаралық көрме – оңтүстікте

Басқа да жаңалықтар

Қазақстан теміржолшысы газеті, №16 03 наурыз 2026 жыл