Цех қайта жабдықталуда

Жаңалықтар

01.11.2016, 17:38

Луговой рельс дәнекерлеу кәсіпорнына Ақтөбеде шығарылған рельстер жеткізілгелі кәсіпорындағы рельс дәнекерлеу цехы қайта жабдықталуда. Осы кәсіпорын ашылғалы бері еңбек етіп келе жатқан Луговой рельс дәнекерлеу кәсіпорнының бас механигі Жанатбек Лесбаев соның арқасында мұнда жұмыс өнімділігі артып отырғанын айтады. Қазіргі цехтағы дәнекерлеу аппараты ресейлік. Ол кәсіпорынға 2008 жылы келген. Алғашында бұл аппараттар Ресейде жасалған ұзындығы 25 метр рельстерді дәнекерлеуге ыңғайланып, цехтағы құрылғылар да солай орналастырылған болатын. Ал бүгінгі күні мұнда отандық өнім жеткізілгелі цехты қайта жабдықтадық. Өйткені, қазақстандық рельстердің ұзындығы – 70, 100, 120 метр. Автоматтандырылған қондырғы қазір жарты сағатта ұзындығы 800 метр рельсті дәнекерлейді. Дәнекерлеу аппаратында Ресей, Украинада оқып келген мамандар – Айдын Шаяхметов, Нұрәділ Масалимов, Елдар Қабибулиндер ауысым бойынша жұмыс жасайды. Аталған аппарат 24 сағат тоқтамай жұмыс істейді. Жоғарыда айтып кеткендей 25 метр рельстерді дәнекерлеуге арналған тораптардың барлығы дерлік қазір 70- 120 метр рельстерге толық ыңғайландырылды. Қазір бір ғана қанаты жұмыс жасап тұр. Алдағы бір айдың ішінде екі қанатта да жаңа рельстер дәнекерленетін болады. Дәнекерлеу апаратына ауа райы және тоқ қуатының мөлшеріне қарай арнайы бағдарламалар енгізіліп отырады. Цехта ауысым алдында «бақылау үлгісі» дәнекерленіп, келесі ауысым оны сындырып қайта дәнекерлейді. Және цехта тұрған екінші украиналық дәнекерлеу аппаратымен ескі рельстер де дәнекерленеді, – дейді аға механик. Цехтан шыққан дайын өнім платформаларға тиелмес бұрын дефескоптық тексерістен өтеді. Дефескопист Рәтбек Қапалбаев дәнекерлеу цехынан шыққан рельстерді бақылап-тексеріп, белгі қойып отырады. Ақау табылмаған жағдайда рельстер бірден платформаға тиеуге жөнелтіледі. Рельсті соңғы тексеру осы жерде жүргізіледі. Ақау табылған жағдайда дефект картасы жасалып, рельс қайта цехқа жөнелтіледі екен. Онда арнайы кесу аппаратында кесіліп, сындырылады екен. «Әзірге өзімізде жасалған рельстерде еш ақау табылған жоқ. Жалпы, қазақстандық рельстер сапасы жағынан ресейлік рельстерден еш кем емес», – дейді Рәтбек Қапалбеков.

Цех қайта жабдықталуда

Басқа да жаңалықтар

Қазақстан теміржолшысы газеті, №30 21 сәуір 2026 жыл