«Бағыт» – теміржолшы әйелдер бірлестігі

Жаңалықтар

20.12.2016, 11:54

Семей қаласында кезінде ұзақ жылдар бойы теміржол саласында еңбек етіп, зейнеткерлікке шыққан теміржолшы әйелдердің «Бағыт» қоғамдық бірлестігі жұмыс істейді. «Бағыттың» бағыты айқын. Салада еңбек ететін нәзікжандыларға рухани һәм моральдық тұрғыдан қолдау, қажет болса көмек көрсету, жас буынға бағыт-бағдар беріп, қызметтік ортаға бейімделу бойынша тәрбие жұмыстарын жүргізуді мақсат тұтқан бірлестікті әйгілі Мойынбаевтар династиясының өкілі, ұзақ жыл Семей вокзалының бастығы болған Нағима Абдуайтқызы басқарады. 2007 жылы құрылған бірлестіктер содан бергі уақытта қаладағы түрлі ұйымдармен бірлесіп тағылымды шаралар жүргізуде. Атап айтсақ, Достық үйінде орын тепкен «Ахау Семей!» қазақ құндылықтарын қолдау орталығымен қанаттасып, қоғамдық шараларға қатысуда. Соның ішінде жас буын арасында ұлттық құндылықтарды насихаттау, қазақстандық патриотизмді қалыптастыру бойынша ілкімді жұмыс жасалыпты. Аталмыш бірлестік мүшелерінің қатысуымен қалалықтар арасында «Қымызмұрындық», «Ақ орамал», «Бауырсақ» сынды шаралар өткізіліпті. Міне, осы сынды ауқымды жұмыстардың қорытындысы есебінде, жуырда аталмыш бірлестік өкілдері салт-дәстүр орталығымен бірлесіп, ел Тәуелсіздігінің 25 жылдық мерекесіне арналған «25 жұлдызды күн» аясында басқосу шарасын өткізді. Жиын барысында аталмыш ұйымның атқарылған шаралары жөнінде есеп тыңдалып, қонақтардың пікіріне де кезек берілді. Көпшілік алдында сөз алған теміржолшылар кәсіподағы ұйымының басшысы Алик Досанов Семей жүк тасымалдау бөлімшесі бастығы Марлен Көкірекбаевтың құттықтауын жеткізе келе, дәстүрлі «әжелер мектебінің» бүгінгі өкілдері ақ кимешекті теміржолшы аналар жұмысына сәттілік тілеп, қоғамдық істе белсенді байырғы сала ардагерлерін марапаттады. Олардың қатарында «Бағыт» қоғамдық бірлестігінің төрайымы Нағима Мойынбаева, сала ардагері Бижамал Қалиқызы, бұрма бағыттамашысы болған Тұрсынғайша Багенова, вагон шаруашылығының ардагері Күләш Құдайбердіқызы Алғыс хатқа ие болды.

«Бағыт» – теміржолшы әйелдер бірлестігі

Басқа да жаңалықтар

Қазақстан теміржолшысы газеті, №55 21 шілде 2026 жыл