Ұстазы жақсы қандай-ды...

Жаңалықтар

20.12.2016, 17:29

Тәуелсіздіктің 25 жылдығы қарсаңында «ҚР Еңбегі сіңген қайраткері» атағымен марапатталған азаматтардың бірі – Темірхан Мұсаев. Темірхан Сырбайұлының есімі Қазақ көлік және коммуникация академиясының түлектеріне жақсы таныс. Түркістан қаласының тумасы Темірхан Сырбайұлы еңбек жолын 1974 жылы Қазақ темір жолы ПЧ-10 мекемесінде бастаған болатын. Темірхан ағаның өмір жолына үңілсең, ол кісі саналы ғұмырын білім жолына арнап келеді. 1975 жылдан бастап Алматы теміржол көлігі инженерлері институтына инженер болып ауысқан ол, 1976-1985 жылдар аралығында «Көпірлер мен жерасты жолдары» кафедрасында ассистент, аға оқытушы, техника ғылымдарының докторы, доцент болып қызмет етеді. 1986 жылы Құрылыс жобаҒЗИ аспирантурасын бітіріп, 1988-1992 жылдары факультет деканы, 1994-1996 жылдары АЛИИТ бірінші проректоры лауазымын атқарады. Ал 1997 жылдан 2001 жылға дейін Қазақ көлік және коммуникация академиясының факультет деканы болса, одан кейін үш жыл аталған білім ордасында оқу ісі жөніндегі бірінші проректоры қызметінде, 2004 жылы ҚазККА ректоры болады. Бір жылдан соң Темірхан Сырбайұлы бұрынғы, оқу ісі жөніндегі проректоры қызметіне қайта оралып, ал 2007 жылдан бастап қазіргі уақытқа дейін «Көлік құрылысы» кафедрасының профессоры лауазымында жастарды біліммен сусындатуда аянбай еңбек етіп жүр. Темірхан Мұсаевтың ізденімпаздығы, білім мен ілімге деген құштарлығы оны жақсы танитын адамдарды тамсандырмай қоймасы анық. 3 монографияның, 4 оқулықтың, 100-ден астам ғылыми және ғылыми-әдістемелік мақалалардың авторы Темірхан Мұсаевтың рационализаторлық қызметте де өзіндік қолтаңбасы бар. Ол өзі жасап шығарған құрылғылардың 2 патентіне ие. « Құрметті теміржолшы», «ҚР Білім берудің құрметті қызметкері» және «ҚР Білім беру үздігі» төсбелгілерімен, КСРО Қатынас жолдары министрлігінің атаулы сағатымен, «Қазақстан темір жолына 100 жыл», «Біртұтас Қазақстан темір жолына 50 жыл» мерейтойлық төсбелгілерімен марапатталған Түркістан қаласының құрметті азаматы Темірхан Мұсаевтың наградалар қоржынына биыл тағы бір марапат – «ҚР Еңбегі сіңген қайраткері» атағы қосылып отыр. Бұл - мыңдаған теміржолшыларға үлкен әріптермен жазылатын Ұстаз ретінде танылған Темірхан Сырбайұлының кезекті еңбек жеңісі, һәм жемісі екені сөзсіз. Бүгінде екі ұлын ұяға, қызын қияға қондырып, 8 немере сүйіп, қырық жыл отасқан адал жарымен бақытты ғұмыр кешіп жатқан Темірхан ағамызды біз де құттықтап, деніңіз сау, отбасыңыз аман болсын демекпіз.

Ұстазы жақсы қандай-ды...

Басқа да жаңалықтар

«Қазақстан теміржолшысы» газетінің 2025 жылғы 8 мамырдағы арнайы саны