Ширек ғасыр белесі

Жаңалықтар

20.12.2016, 18:01

Гүлнар Төлеуханованың Семей жүк тасымалдау бөлімшесіндегі өндірістік-техникалық бөлім басшылығы қызметін табан аудармастан атқарып келе жатқанына он жылға жуықтапты. Ал аға буынның ізін басып келе жатқан сала қызметкерінің темір жол саласына келгеніне биыл тұп-тура 25 жыл. Ол ел Тәуелсіздігі жылдарында темір жол саласында орын алып жатқан өзгерістерге, жаңашылдықтарға толық куә. Гүлнар Сейілханқызы Түрксібпен бірге бой көтерген Шар станциясының тумасы. Мектепті алтын медальмен бітірген соң Алматыдағы теміржол институтына оқуға қабылданды. Бұл – әйгілі 1986 жыл болатын. Желтоқсан қозғалысында теміржолшы студенттермен қатар алаңға барып, ел болашағына алаңдаушылық білдіріп, үндеуге үн қосты. Азаматтық ұстанымы ең алғаш осылайша патриоттық жігермен қалыптасқан жаңа буын өкілі 1991 жылдың желтоқсанында ел Тәуелсіздігі туралы декларацияның жариялану сәтін де ерекше толқумен қарсы алды. Бұл кейіпкеріміздің қызметке енді ғана қабылданып, Семей станциясы бойынша кезекші қызметін атқарып жүрген кезі екен. Кешкілік теледидардан осы жүрекжарды жаңалықты естіген сәтте, бірінші кезекте сонау 1986 жылдың ызғарлы желтоқсаны, алаңдағы толқыған жастар, азаттыққа ұмтылған алғашқы мезет ойына оралыпты. Содан бері ширек ғасырдай уақыт өтіпті. Осы кезеңнен бергі аралықта Семей станциясында инженер, бөлімшеде аға инженер, өндірістік-техникалық бөлім бастығының орынбасары сынды сатылы қызметтерді атқарып, 2007 жылдан бастап бөлімшедегі өндірістік-техникалық бөлімнің басшысы болып тағайындалды. Гүлнар Сейілханқызының бүгінгі қызметі де қауырт жұмыспен басталды. Техникалық-нормативтік құжаттамаларды реттеу, өндірістік көрсеткіштерді тізімдеп, сараптама жасау сынды шаралар күнделікті жүргізіледі. Өндірістік-техникалық бөлімді «бөлімшенің жүрегі» деп бекерге атамайды. Себебі, желі бойындағы барлық станциялардағы атқарылған еңбек осында топтастырылып, жүйеленеді. Жүргізілген жұмыс барысын құжат түрінде қағазға түсірудің өзіндік талабы, заңдылығы бар. Бүгінде Семей жүк тасымалдау бөлімшесі бойынша 53 станция пойыздар қозғалысына қызмет көрсетуде. Сәйкесінше олардың барлығынан атқарылған еңбек есебі қабылданып, әрқайсысына қажетті нұсқау берілуі керек. Яғни, өндіріске енгізілуі тиіс жаңашылдықтар мен жұмыс технологиясы, алдағы күндерге бағыт-бағдар осы бөлімнен беріледі. Осынау жұмыстың барлығы бір күн ішінде бөлім бастығы Гүлнар Сейілханқызының қолынан өтеді. Ағымдағы жылы бөлімше бойынша бірыңғай техникалық процеске көшу ісі басталғандықтан бөлімге артылған әр міндеттемеге жіті қарау қажет. –Біздің бөлімше бойынша бүгінде станциялар қызметінде бірқатар жаңашылдықтар бар. Атап айтсақ, жұмыс орындарын автоматтандыру ісі жүргізіліп жатыр. Сонымен қатар құжаттамалар айналымы да электронды түрде атқарылады. Заман талабына сай технологиялық процестер де өзгеруде. Сондықтан да, әрбір станция қызметкеріне қойылатын талап та жоғарылай түседі, – дейді Гүлнар Сейілханқызы. Бөлім басшысының құзырына еңбекті қорғау мен өндірістік бөлім де кіреді. Бұл тарапта да атқарылатын жұмыстар ауқымы кең. Сол себепті де бөлімше бойынша ұзындығы 724 шақырымнан тұратын желі бойына іссапарға жиі шығуға тура келеді.

Ширек ғасыр белесі

Басқа да жаңалықтар

Қазақстан теміржолшысы газеті, №55 21 шілде 2026 жыл