Қаңтарда қармен күрес қарқын алды

Жаңалықтар

10.01.2017, 10:26

Арқа өңіріне Жаңа жыл жатырқай кірген кейіп танытты. Желтоқсанның соңғы күндерінен басталып, қаңтардың алғашқы аптасы тынбай үсті-үстіне жауған қар ұйытқыған жел мен боранға ұласты... Арқаның теміржолшылары «кәрі құданың» қатал мінезінен жақсы хабардар. Сондықтан олардың «бес қаруының» қашанда сақадай сай тұратын әдеті. Бұл жолы да қар тазалауға тайлы-тұяғымен жұмылған теміржолшылар іске ауыр техниканы да қосты. Ірілендірілген Астана жол дистанциясының жолшыларын біз Астана станциясы басындағы 12-ші ауданда қалың қарды аршып жатқан қызу жұмыс үстінде жолықтырдық. –Қатты боранды күндері рамаларды тығыздалған ауамен үрледік. Үсті-үстіне жауған қар қалың түсті, сол себепті Астана – Жайнақ аралығындағы бүкіл жолшыны осында алдырдық. 96 разъезде жол колоннасы бар, соның жұмыскерлері де бар. Қазір 20 адам жұмыс істеуде. Олар қарды негізгі жолдарға лақтыруда, ал олардың соңынан қар тазалайтын СМ-5 техникасы жүріп отырып, жолды тазалап, үйілген қарды өзіне артуда. Жас машинист Мәжит Мұхаметжанов СМ-5 машинасының тізгінінде, техниканың тілін өте жақсы білетін маман. Бұдан бөлек, СМ-7 деген екі базалы техника бар, соған тепловоз тіркеп, жол шеберлері бастап, жолшылар телімдер бойын қардан тазартып, пойыздар қозғалысына жол ашып жатыр. Боранды күндері жолшылар екі ауысыммен жұмыс істеуде. Бұдан бөлек, телімдерде жол монтерлері кезекшілікке қойылған. Ең бастысы, біздің тарапымыздан пойыздар қозғалысының кестесі, қауіпсіздігі бұзылған жоқ, – дейді Ірілендірілген Астана жол дистанциясына қарасты 4-ші телім бастығының міндетін атқарушы Әділбек Жетпісов. Дистанция директоры Жанат Әлжанов алға тартқан деректерге сүйенсек, 1-5 қаңтар аралығында СДПМ қар тазалаушы машинасымен 1733 км жол қардан аршылған. Сонымен қатар УПЧ-17 Астана дистанциясы бойынша СМ-2, СМ-5, СМ-7 техникаларымен 12150 текше метр қар шығарылған. Қардың қалың түскені соншалық, Астана станциясында жолды қардан тазарту үшін екінші кезектегі теміржолшы-қызметкерлерді тартуға тура келіпті. Олардың арасында, вагон пайдалану депосы, Әскерилендірілген күзет қызметі, Астана станциясы, Қырқыншы механикаландырылған жол дистанциясы жұмыскерлері де бар.

Қаңтарда қармен күрес қарқын алды

Басқа да жаңалықтар

«Қазақстан теміржолшысы» газетінің 2025 жылғы 8 мамырдағы арнайы саны