Жаңа вокзал мамырда пайдалануға беріледі

Жаңалықтар

13.01.2017, 10:26

Сәрсенбі күні ҚР Премьер-Министрінің бірінші орынбасары Асқар Маминнің төрағалығымен Астана қаласының жаңа теміржол вокзалының құрылысы және Астана станциясының теміржол торабын дамыту мәселелері бойынша көшпелі кеңес өтті. Аталған жобаларды іске асыру барысы жайлы «Қазақстан темір жолы» ҰК» АҚ басшысы Қ. Алпысбаев баяндады. Ол қазіргі таңда Астананың вокзал кешені мен теміржол торабының әзірлігі 80% құрайтынын мәлімдеді. Қазіргі уақытта бетон жұмыстары, ғимараттың металл қаңқасын құру, шатыр жұмыстары, ғимараттың жылыту бөлігінің қасбеттерін қаптау аяқталды, орталықтан жылыту іске қосылды. Кірме теміржол эстакадасында металл аралық құрылыстарын құру аяқталды, шуылдан қорғау экранының тірек бөліктері мен металл құрылыстарын монтаждау соңына таяп қалды, жолдың жоғарғы құрылысы салынып жатыр. Вокзалдың ернеулерін қаптау жұмыстары, ғимараттың жылытылмайтын бөлігінің қасбеттерін әрлеу, ауа алмастыру жүйесін монтаждау, сыртқы электрмен қамту жұмыстары 90% аяқталды. Вокзал ғимаратының ішіндегі әрлеу жұмыстары қарқынды түрде жүргізіліп жатыр. 2017 жылдың 1 мамырына қарай вокзал ғимаратындағы лифттер мен эскалаторларды монтаждау, іске қосу және жөндеу, төңіректі абаттандыру және көгалдандыру, сонымен қатар әрлеу жұмыстарын аяқтау жоспарланған. Елорданың жаңа теміржол вокзалы аумағындағы инженерлік коммуникациялар мен жол құрылысы жұмыстарының барысы туралы Астана қаласы әкімінің орынбасары Қ. Айтмұхаметов есеп берді. «Қазақстан темір жолы» ҰК» АҚ жетекшісі Қанат Алпысбаев өз кезегінде қала басшылығымен бірге барлық жолаушы ағынын жаңа вокалға бағыттау жұмысын жүргізу қажеттігіне тоқталды. –Бізде қазір жұмыс жоспары мынадай: біз алдымен жаңа вокзалды қалыптастыруымыз керек, сосын ашылудың 60 күн алдын ол туралы бүкіл ТМД-ға мәлім етіп, билет сатуды бастаймыз. Автобус қозғалысы мен пойыз қозғалысын бірге үйлестіру қажет, – деді Қанат Қалиұлы. Сондай-ақ, мердігер ұйымдардың басшыларының құрылыс-монтаждау жұмыстарын атқару, жаңа теміржол вокзалын пайдалануға беру қызметінің жұмыстары туралы есептері тыңдалды. Аталған нысан құрылысында шамамен 1 150 адам жұмыс істейді. Астананың жаңа теміржол вокзалының өткізу қабілеті – тәулігіне 35 мың жолаушы. Көшпелі кеңес қорытындысы бойынша ҚР Премьер-Министрінің бірінші орынбасары А. Мамин вокзал кешені мен Астана станциясының теміржол торабы құрылысын аяқтауға байланысты бірқатар нақты тапсырмалар берді. Ол аталған нысандардың Халықаралық ЭКСПО көрмесі қарсаңында сапалы әрі уақытылы тапсырылуының маңыздылығын айтып өтті.

Жаңа вокзал мамырда пайдалануға беріледі

Басқа да жаңалықтар

Қазақстан теміржолшысы газеті, №87 21 қазан 2025 жыл