Жазғы тасымалдау кезеңіне жолаушылар вагондарын дайындау жүргізілуде
«Жолаушылар тасымалы» АҚ техникалық парктерінде жолаушылар вагондарын жазғы тасымал маусымына дайындау жұмыстары тәулік бойы жүргізілуде. Бұл шаралар жолаушылардың сапарын барынша жайлы әрі қауіпсіз ету мақсатында қолға алынған, деп хабарлайды Rail-news.kz.
Регламентке сәйкес вагонның астындағы жабдықтар мен дөңгелектерді жоспарлы тексеру, вагондардың сыртын жуу және жүріс бөліктерін тазалау, тамбурлар мен тұтқаларды ішінара сырлау жүргізіледі. Одан бөлек терезелер толық тазаланып, ондағы резеңке таспалар мен тығыздағыштар ауыстырылады. Тексеру жұмыстары барысында барлық ақаулар жойылады.
Пойызды жолға шығару алдында барлық вагондардың еденнің, төбенің, үстелдердің үсті, дивандардың және терезелердің беттері санитарлық және дезинфекциялық өңдеуден өтеді. Дезинфекция санитарлық ережелерге сәйкес себу, тозаңдандыру және препараттармен сүрту әдісімен жүзеге асырылады.
Пойыз бригадасының қызметкерлері жеке қорғаныс құралдарымен (маскалар, қолғаптар, антисептиктер) қамтамасыз етілген. Сапар алдында қызметкерлер ауысым алдындағы медициналық тексеруден өтеді.
Өндірістік персонал үшін тұрақты негізде қауіпсіздік шараларын сақтау, алғашқы медициналық көмек көрсету және қызметтік әдеп нормаларын сақтау бойынша нұсқамалар жүргізіледі.
Қазіргі таңда елімізде жолаушылар пойыздары 130 бағыт бойынша жүреді. Соның ішінде 99 бағытты «Жолаушылар тасымалы» АҚ қамтамасыз етсе, қалған 31 бағытта 14 жеке тасымалдаушы компания қызмет көрсетеді.
«Жолаушылар тасымалы» АҚ вагон паркі 2 168 бірліктен тұрады. Оның құрамына мыналар кіреді:
• стандартты вагондар – 1 322 бірлік (61%),
•«Тальго» үлгісіндегі вагондар – 732 бірлік (34%),
• моторлы вагондар (МВПС) – 114 бірлік (5%).
Вагондардың орташа пайдалану мерзімі – 16 жыл.
