«Burabay Express» электропойызы іске қосылды
«Қазақстан теміржолшысы» газетінің тілшісі
Астана – Бурабай курорты бағытына қатынайтын «Burabay Express» электропойызының тұсауы кесілді. «Нұрлы жол» теміржол вокзалына отандық зауыттан шыққан су жаңа электропойыз туристік бағдар бойынша жолға шықты.
Жаңа буын электропойызының іске қосылуы барысында «Қазақстан темір жолы» ҰК» АҚ Басқарма төрағасы Талғат Алдыбергенов туристік және көлік инфрақұрылымын дамыту мәселелеріне арналған көшпелі кеңес өткізді. Электрпойыз бортында өткен кеңеске Көлік министрлігінің Теміржол және су көлігі комитетінің төрағасы Жәнібек Тайжанов, «KazakhTourism» АҚ және Туризм комитетінің өкілдері қатысты. Мәртебелі меймандар су жаңа электропойызды аралап көріп, жолаушыларға ұсынынылатын сервистік қызметтермен танысып шықты.
Кеңес барысында Алакөл, Бурабай, Балқаш сынды курорттық аймақтармен теміржол қатынасын дамыту, вокзалдарды жаңғырту және қызмет көрсету сапасын арттыру мәселелері талқыланды. Жолаушыларды тасымалдау үшін қолайлы жағдайлар жасауға ерекше назар аударылды. Сонымен қатар балаларға арналған жеңілдікпен жол жүру мүмкіндіктері отбасылық туризмді дамытуға жақсы алғышарттар жасайтыны атап өтілді.
Басқарма төрағасы жолаушылар пойыздарының қозғалысын қамтамасыз етуде кестеден ауытқуды жедел әрекет ету арқылы азайтуды, сондай-ақ туристік бағыттарды дамыту мен қозғалыс қауіпсіздігін қамтамасыз етуге басымдық беруді тапсырды. Ел аумағындағы 125 вокзалдың жөндеу жұмыстарының барысы да сөз болды. Жұмыстардың мерзімінде және сапалы орындалуының маңыздылығы назардан тыс қалмады.
«Burabay Express» электропойызын шығарып салу рәсімінде сөз сөйлеген «ҚТЖ» ҰК» АҚ басқарма төрағасының орынбасары Әнуар Ахметжанов жолаушыларға жоғары сервис ұсыну – ұлттық тасымалдаушы қызметінің басты ұстанымы екенін жеткізді.
– «Жолаушылар тасымалы» АҚ жолаушыларға Астана – Бурабай курорты бағдары бойынша №888/887 «Burabay Express» жаңа буын электр пойызын ұсынып отыр. Жаңа электропойыз Петропавл қаласындағы отандық зауытта шығарылған және сандық шешімдерді есепке ала отырып, көп деңгейлі сервистік қызмет көрсетуді, жылдам қозғалысты біріктіре, халықаралық стандарттардың барлық талаптарына сәйкес келеді. Елордадан Қазақстанның ең танымал туристік бағыттарының біріне дейін сапар небәрі 2,5 сағатты алады. Ұлттық тасымалдаушы жолаушыларға пойызға елорданың екі вокзалынан мінуді және курорттық аймақтағы қонақүйлерге кіру мен шығу үшін ыңғайлы кестені ұсынып отыр, – деді Әнуар Ахметжанов.
«Burabay Express» аптасына бес рет жүреді. Бұл бағдарға билеттерді клиенттер алғаш рет пойыз жөнелтілгенге дейін 45 күн бұрын сатып ала алады. Жол жүру құнына келсек, бірінші класты вагонға 5 805 теңге, екінші класты 3 586 теңге және үшінші класты 2 962 теңге. Астанадан таңертең сағат 11:00-де жөнелтілген электропойызы Бурабай курорты станциясына сағат 13:35-те келіп жетсе, ал Бурабай курортынан осы күні сағат 14:15- те кері қайта жолға шығып, елордада сағат 17:00-де болады. Электропойыздың қала маңындағы құрамына ауаны баптау жүйесі, қызмет көрсетудің жайлы үш класы бар, 374 орынға есептелген 6 вагон кіреді. Бірінші класты жолаушыларға реттелетін арқалықтары мен жеке үстелдері, багажға арналған сөресі бар жоғары жайлылық креслолары ұсынылады. Ақпараттық және ойын-сауық контентін көрсету үшін мониторлар жабдықталған, Wi-Fi мультимедиялық жабдықтары орнатылған. Әрбір отырғызу орнында гаджеттер мен мобильді құрылғыларға арналған USB қосқыштары бар. Вагон сапар кезінде қауіпсіздікті қамтамасыз ету үшін бейнебақылау жүйесімен жабдықталған. Жолаушыларға борттық тамақтану ұсыну жағы қарастырылуда. Екінші класты вагон қолжетімді баға мен қызметтің жоғары деңгейін, Wi-Fi мультимедиялық жабдықтарын, бейнебақылауды, ұялы телефондардың зарядтау нүктелерін біріктіреді, сонымен қатар әртүрлі сусындар мен әртүрлі мәзірлерді сататын купе-буфет орнатылған. Ал үшінші класты вагонда жылдам зарядтау функциясы бар кіріктірілген USB/Type-C розеткалары бар ыңғайлы креслолы орындар қарастырылған. Тамбур аймағында велосипед тұрағы үшін қолжетімді орын да бар. «Burabay Express» инклюзивтілік, ыңғайлылық және қолайлылық қағидаттарын ескере отырып әзірленген. Жаңа электропойыздың үшінші класы екі жағынан да платформалық көтергіштермен және арнайы санитарлық аймақпен жабдықталған, бұл ерекше қажеттіліктері бар жолаушыларға қолайлы болмақ.
Барлық вагондарда платформасы төмен станциялардан отыруды және түсуді жеңілдететін автоматты жылжымалы аяқ тіректері бар, бұл әсіресе егде жастағы адамдар мен балалары бар жолаушылар үшін ыңғайлы. Сондай-ақ арнайы қажеттіліктері бар жолаушыларға арналған кеңейтілген кабиналарды қоса алғанда, биодәретханалар орнатылған. Пойыздың сыртқы келбеті Ұлттық тасымалдаушының фирмалық стилінде безендірілген. Локомотив бригадалары үшін де қауіпсіз жұмыс жағдайларын қамтамасыз ететін көп позициялы реттелетін эргономикалық креслолар қарастырылған.
«Burabay Express» жаңа құрамын іске қосу – бұл қызмет көрсету сапасын арттыруға, инновацияларды енгізуге және барлық азаматтар үшін көлік қызметтерінің қолжетімділігін қамтамасыз етуге бағытталған қала маңындағы тасымалдарды дамытудағы кезекті қадам», – деді Әнуар Ахметжанов.