«Keruen Express» турпойызымен 130-дан астам жолаушы сапарға аттанды
26 тамыз күні «Жолаушылар тасымалы» АҚ іске қосқан «Keruen Express» туристік пойызы «Алматы–Түркістан–Самарқан–Бұқара–Ташкент–Алматы» бағыты бойынша 130-дан астам жолаушы сапарға шықты, деп хабарлайды Rail-news.kz.
Бұл бағыт Қазақстан мен Өзбекстанды байланыстырып, жолаушыларға екі елдің тарихи және мәдени мұраларымен танысуға бірегей мүмкіндік береді. Саяхат ұзақтығы – 6 күн: 2025 жылғы 26–31 тамыз аралығы.
«Туроператорлардың қолдауымен Алматы қаласындағы Қиын өмірлік жағдайдағы балаларды қолдау орталығының 25 тәрбиеленушісі осы турға тегін қатысу мүмкіндігіне ие болды. Бұл – балалар үшін жаңа қалаларды көріп, өңірдің мәдени мұрасымен жақынырақ танысуға зор мүмкіндік», – деп атап өтті, «ҚТЖ» ҰК» АҚ Басқарма төрағасының орынбасары Әнуар Ахметжанов.
Аталған құрам Қазақстан мен Өзбекстан арасында қатынайтын жетінші турпойыз болды. Пойыз бес заманауи вагоннан тұрады: төртеуі – купе, біреуі – вагон-мейрамхана. Барлық вагондар отандық өндірістен шыққан, жолаушыларға қолайлы сапарды қамтамасыз етуге қажетті жабдықтармен толық жасақталған. Ішкі безендіру ұлттық нақышта, қазақтың дәстүрлі ою-өрнектерімен өрнектелген.
Маршрут екі елдің ең ірі мәдени және тарихи орталықтарын қамтиды. Бағдарламада Түркістандағы Қожа Ахмет Ясауи кесенесі мен Отырар қалашығы, Самарқандтағы Әмір Темір кесенесі мен әйгілі Регистан алаңы, Бұқарадағы Арк қамалы мен Ляби-Хауз кешені, Ташкенттегі Хазрет Имам мемориалдық кешені мен Төле би кесенесі және басқа да тарихи орындар бар.
Тур бағасына пойызбен жол жүру, кәсіби гидтердің қатысуымен экскурсиялық бағдарлама, тарихи нысандарға кіру билеттері және туроператорлар ұйымдастырған трансферлер кіреді.
«Keruen Express»-тің іске қосылуы – теміржол туризмін дамытудың маңызды қадамы. Бұл бастама Қазақстан мен Өзбекстан арасындағы мәдени байланыстарды нығайтып, өңірдің тарихи мұрасын кеңінен насихаттауға ықпал етеді.
