Жыл басынан бері ҚТЖ пойыздары 7,8 миллионнан астам жолаушыны тасымалдады

«Жолаушылар тасымалы» АҚ жеті айдың жұмыс қорытындысын жариялады. Осы кезеңде Ұлттық тасымалдаушының пойыздарымен 7,8 миллионнан астам жолаушы сапарға шықты, деп хабарлайды Rail-news.kz.  

Ең жоғары сұранысқа ие бағыттар – Астана–Алматы, Астана–Шымкент, Алматы–Шымкент, Астана–Семей және Алматы–Семей».

Жолаушылар ағыны әсіресе жазғы және қысқы маусымдарда, сондай-ақ мереке және демалыс күндері арта түседі.  

Осыған орай, 2025 жылдың жазында «Жолаушылар тасымалы» АҚ  13 қосымша маршрут ұйымдастырып, Алакөл бағытына арнайы пойыздар тағайындады. Олардың қатарында Астана–Достық, Алматы–Достық, Семей–Шар–Достық, Өскемен–Актогай–Достық, Қызылорда–Достық және Павлодар–Достық бағыттары бар. Сондай-ақ сұранысы жоғары Астана–Алматы, Астана–Шымкент және Ақтөбе–Астана қатынастары қосымша күшейтілді.

Жолаушылар үшін енгізілген заманауи сервистердің бірі – «Күту парағы» жүйесі де кеңінен қолданылуда. Ол бос орын шыққан жағдайда билетті жедел рәсімдеуге мүмкіндік береді. Қызмет bilet.railways.kz сайтында және барлық билет кассаларында қолжетімді. 2025 жылдың басынан бері бұл сервисті 281 мыңнан астам клиент пайдаланып, 105 мыңнан аса жолаушы билет сатып алды.

Компания паркінің жаңаруы да тұрақты түрде жалғасуда. Бүгінде «Жолаушылар тасымалы» АҚ вагон паркінде 2 204 вагон бар, оның ішінде 1 060 стандартты вагон, 656 «Тальго» және 94 электр пойызы бар. Соңғы он жылда парк 50 пайызға жаңартылды. Алдағы жылдарда бұл үрдіс жалғасын тауып, 2030 жылға дейін Stadler Kazakhstan зауытынан 557 жаңа заманауи вагон жеткізіледі. Биылдың өзінде Ұлттық тасымалдаушыға 51 Stadler Kazakhstan вагоны және ЗИКСТО зауытында шығарылған 63 отандық вагон берілмек.