Болашақ станциясында пойыздар саны артқан
Биыл жыл басынан бергі бес ай ішінде Болашақ станциясынан 302 пойыз жөнелтіліп, Түрікменстаннан 307 пойыз жүк келген.
Станция бастығы Мақсат Нұрбековтің айтуынша, былтырғы дәл осы аралықтағы көрсеткішке қарағанда Түрікменстан елінен келетін пойыздар 27-ге артқан. Ал Қазақстаннан түрікмендерге тапсырылған пойыздар 10-ға ғана көбейіпті.
– Мемлекетаралық түйісу нүктесі болып саналатын Болашақ станциясында теміржолшылар қозғалыс қауіпсіздігі ережелерін қатаң сақтай отыра, тасымалдың барлық түрлерін өз деңгейінде жүзеге асыруға атсалысуда, – дейді станция бастығы.
Жүк түрлеріне келер болсақ, биыл осы кезеңде ең көп жөнелтілген жүк бидай болған, өткен 5 айда барлығы 2948 вагон бидай жіберіліпті. Одан кейінгі орында 1114 вагон бидай ұны, 387 вагон қара металл, 285 вагон дәнді дақылдар тұқымы, 147 вагон құбыр, 111 вагон этил спирті, 105 вагон құрылыс өнімдері, 85 вагон пиломатериалдар, сонымен қатар 62 вагон жеңіл автокөлік, 80 вагон залалсыздандыру аппараттары, асбест, агрегаттар, бұрғылау қондырғылары, жүгері, асбұршақ дәндері, картоп, автомобиль майлары, макарон өнімдері, сұлы және тағы да басқалары тұр.
Ал елімізге Болашақ арқылы келіп жатқан жүк түрлеріне келер болсақ, бос вагондардан бөлек 217 вагон кептірілген жемістер ең көп келген. Сонымен қоса 88 вагон шыны ыдыстар, 28 вагон полипропилен, полиэтилен, жуу пастасы, мұнай коксы, желім, мандарин, мотор майлары, жиһаздар, пластмасса өнімдері, мрамор өнімдері, автобөлшектер, битум, Джут талшығы, қыша және тағы басқа бұйымдар мен азық-түлік және құрылыс материалдарының түрлері тасымалданған.