Ақтөбелік кәнігі маманның пайымынша маневрлік қозғалысты басқару ең күрделі жұмыс
Ақтөбе облысы бойынша меншікті тілші
Құрметті теміржолшы Бекболат Бермағанбетов Ақтөбе станциясының маневрлік диспетчері. Күрделі де қиын салада еңбек етіп келе жатқанына биыл 42 жыл. Қысқасы, осы саланың «майын ішіп, жілігін шаққан» майталман.
Еңбек жолын 1980 жылы Ақтөбе станциясында пойыз құраушының көмекшісі болып бастаған кейіпкеріміз пойыз құрастырушы, бағыттаушы, станция кезекшісі, станция басшысының орынбасары қызметтерін атқарды. Қазір «Ақтөбе-1» және «Ақтөбе-2» станциясындағы пойыздар қозғалысын реттеп отыратын маневрлік диспетчер. Станциядағы пойыздар қозғалысы, вагондарды тарату-жинау, қайта құрастыру, дайын құрамдарды жасақтап, локомотивті пойызға тіркеп, жолға шығару – осы маневрлік диспетчердің сауатты іс-әрекетіне тікелей байланысты.
«Бүкіл қозғалысқа жауапты диспетчер жұмысының оңайы жоқ, дегенмен ең қиыны – маневрлік қозғалысты басқару екенін осы жұмысты істеп көрген адам түсінеді. Алматы, Атырау, Ақтөбе бағытындағы жолаушылар пойызын да шығарып, дайындап береміз. Станция кезекшісі қабылдап алып, сапарға аттандырады. Сонымен қатар, тиеу-түсіру жұмыстарымен айналысатын жергілікті жүк пойыздарын да дайындаймыз. Қысқасы, жұмыс қиын да күрделі, мүлт кетуге болмайды», – дейді ол.
Теміржолшының әр ауысымы жоспармен танысудан басталады. Құрылған кесте негізінде ағытылуы керек пойыздар мен екі станциядағы локомотивтер қозғалысымен мұқият танысып шығып, өз қызметіне кіріседі, яғни құрамды тарқатады, жинай- ды, қай вагонды қайда апарады, тіркейді, пойыз құрастырушы, белгі беруші, станция басындағы қозғалыс үдерісіне жауапты мамандармен бірге жұмысты бастайды. Станцияда тапжылмай осынша жыл еңбек еткен Бекболат Бермағанбетовтей теміржолшы көп емес. Сондықтан болар, шәкірттері де аз емес, алды Астанада, Ақтөбеде басшылық қызметтерде жүр. «Ұстаздан шәкірт озар» деген, олардың жетістіктеріне тек қуанады.