Жолсеріктер ағылшын тілін қалай меңгеріп жатыр?

Бірнеше жыл бұрын «Жолаушылар тасымалы» АҚ қызметкерлері арасында ағылшын тілін меңгеру үрдісі белең алды. Жаппай ағылшынша тіл сындыруға көшкен жолсеріктер бастамасы қандай нәтиже берді?  

Біздің бүгінгі кейіпкеріміз Нұрболат Байпақов – «Батыс» жолаушылар тасымалы филиалына қарасты «Ақтөбе-Атырау» жолаушылар пойызының бастығы. Осыдан отыз жыл бұрын, 1992 жылы еңбек жолын бастаған ол кезінде халықаралық пойыздарда жолсерік болыпты. «Алматы-Мәскеу» бағытындағы жолаушылар пойызында да жабылғанша бірнеше жыл жүрді.  

Тәжірибелі маман бүгінде өз алдына бір құрамды басқарып отырған пойыз бастығы болған соң жауапкершілік еселеп артқанын, бұрын бір вагонға жауап берсе, бүгінде бүкіл құрамға жауапты екенін айтады. Нұрболаттың бригадасы – ағылшын тілі курсына қатысып, тіл үйренуге ықылас қойған алғашқылардың бірі.  

«Жолаушыларға сервистік қызмет көрсететін жолсеріктер мен аспансеріктерге ағылшын тілін меңгеру қажеттігі ЭКСПО кезінде өзекті бола түсті. Ағылшын тілінде еркін сөйлеп кету оңай емес әрине, дегенмен жолаушыларға қызмет көрсету  барысында қолданылатын қажет сөздерді үйрендік. Арнайы курс бітіріп шыққанбыз. Қазіргі кезде жетілдірудеміз. Негізі, тіл білу – қажеттілік. Халықаралық пойыз болмасақ та ел ішінде жүрген шетелдіктер мінеді. Саяхаттап жүретіндер болады. Біздің жолсеріктер мақтанып айтып отырады, «Шетелдік жолаушымен ағылшын тілінде түсіністік, риза болып қалды...» деп. Демек, біреу үшін емес, әркім өзі үшін тіл үйренгені жөн, қай жаста болсаң да», – дейді Нұрболат Байпақов.

Соңғы сегіз жылдан бері 691-692 нөмірлі «Ақтөбе-Атырау» пойызының бір бригадасын басқарып отырған кейіпкеріміздің баса мән беретіні тазалық мәселесі екен. «Тазалық бар жерде сервис те бар, басқа да бар. Әр сапарда 400-ге жуық жолаушының вагонда өз үйінде отырғандай жайлы сезінуі үшін қызмет көрсету – біздің міндетіміз, сол үшін жалақы аламыз. Осыны жолсеріктерге сапар сайын қайталап отырамын», – дейді кейіпкеріміз.