Нұр-Сұлтан станциясының пойыз құрастырушысы «Алғыс хат» алды
«Қазақстан теміржолшысы» газетінің тілшісі
Төл мереке қарсаңында Нұр-Сұлтан станциясының пойыз құрастырушысы Әбілғазы Нағмадин «ҚТЖ» ҰК» АҚ басқарма төрағасының Алғыс хатына ие болды. Теміржолда 13 жылдан бері еңбек етіп келе жатқан Әбілғазы – Сыр өңірінің, соның ішінде Қазалының тумасы. Әкесі өмір бойы локомотив депосында еңбек еткен, қазір оның өзі де, қалған бауырлары да сол әке жолын қуып, тағдырын теміржолмен байланыстырып отыр. Оны бүгінде басшылық кәсіби біліктілігі, төтенше жағдайлар кезінде бірнеше рет қауіпсіздік талаптарының бұзылуының алдын алғаны, қашан да озық білім мен тәжірибені үйренуден жалықпайтыны үшін жоғары бағалайды. Пойыздық және маневрлік жұмыстар кезінде ақаусыз жұмыс істеп, кіреберіс жолдардан вагондарды дер кезінде алып, уақытылы беріп отырады. Тасымалданып келе жатқан жүктер мен вагон паркінің сақталуын қамтамасыз етеді. Осындай еңбегі үшін ол бұған дейін де Еңбек қорғау және техникалық қауіпсіздік бойынша және мерекелерде бірнеше марапаттарға ие болған. Теміржолшылар әулетінде дүниеге келген Әбілғазы мектептен соң Ақтөбедегі теміржол техникумына оқуға түседі. Еңбек жолын елордаға 2006 жылы келіп бастаған, станцияда әуелі белгі беруші, сосын реттеуші болып жұмыс істейді.
– Бір ауысымға үш адамнан түсеміз, 4 бағытта пойыздар шығара береміз. Бір ауысымда 15-17 пойыз шығарамыз. Күнделікті жұмыстағы басты құралдарымыз – рация, жалауша, ысқырық. Маневрлік жұмыстар кезінде машинист және парк кезекшісімен байланысты жұмыс істейміз. Жалпы пойыз құрастырушы дегеніміз – түрлі құрамдардағы пойыздарды құрастыру, тарқату ісімен айналысатын қызметкер. Олар пойыздар қозғалысын басқарады да, әрі сол жұмысты өздері атқарады, – дейді пойыз құрастырушы.
Ұжым Алғыс хат алуға лайықты деп тапқан теміржолшы жетістікке жетуіне компания тарапынан білім жетілдіру шараларының жақсы жүргізілуі сеп болғанын айтады. Станция басшылығы кезекпен Қарағандыға 10 күнге оқуға жіберіп тұрады. Оның техникалық сабақ беретін Ақтоқты Ораққызы мен еңбек қорғау жөніндегі инженер Айымгүл Аубакишеваға айтар алғысы шексіз. «Екеуі де менің бір нағыз ұстазым, тәлімгерім сияқты. Сабақты жақсы үйретеді, жанашыр, тіпті туған әпкеміз, анамыз сияқты болып кеткен. Ұжымда ауызбіршілік мықты болса өз ісіңе деген құлшыныс пен ынта да арта түсері сөзсіз», – дейді ол. Бүгінде екі баланың әкесі Әбілғазы Еділбекұлы ата жолына берік болып, кәсібі мен нәсібін болат жолдан тапқанына риза екенін айтады.