Семейде пойыздарды жедел тежеу көрсеткіші екі есе өскен

Семей темір жолында қараусыз мал мәселесі қауіптіліктің «қызыл» деңгейіне көтерілді деуге болады. Осыған байланысты аймақ теміржолшылары қатаң шаралар қабылдауға мәжбүр болып отыр.

Семей магистральдық желі бөлімшесінің басшысы Айдын Мақсұтбекұлының тікелей бастамасымен қолға алынған шаралар нәтижелі түрде жүзеге асырылуда. Желі бойындағы қараусыз мал әсіресе Семей жол дистанциясының жолшыларын қатты алаңдатуда. Оған негіз бар. Атап айтсақ, өткен жылдың тоғыз айында 44 жедел тежеу орын алған болса, биылғы жылы бұл көрсеткіш 70-ке жетіп отыр. Сол тәрізді өткен жылы бес мал басу оқиғасы орын алса, бұл көрсеткіш ағымдағы жылы 12-ге жеткен. Өткен жылы бір ғана қыркүйек айында 8 шұғыл тежеу тіркелсе, биыл оның саны 16-ға жетіп отыр. Яғни екі есе, кейбір көрсеткіштер бойынша тіпті үш есеге дейін өсіп отыр.  

– Желі бойында қараусыз жайылған малдың кесірінен бөлімшедегі теміржол шаруашылықтарына біршама шығын келуде. Жанармай орынсыз жұмсалып, кейбір телімдердегі жүк және жолаушылар пойыздарының жүріс кестелері бұзылуда. Мәселен, биыл 9 жолаушылар пойызы теміржолға шығып кеткен қараусыз мал кесірінен тоқтауға мәжбүр болған. Аталған оқиғалар біздің дистанциямызға қарасты Дегелең – Жаңа-Семей және Ауыл – Семей арасындағы қумажолдарда орын алған, – дейді ПЧ-39 мекемесінің бас инженері Мырзабек Керейбаев.  

Осы жылдың тоғыз айы ішінде Семей станциясындағы желілік полиция қызметкерлері қараусыз мал мәселесі бойынша 20 істі қарап, заң аясында шешім қабылданыпты. Мал иелеріне қомақты көлемде айыппұл салынған. Алайда, ақша төлеп құтылған 12 шаруа өзгелерге сабақ болмай тұр. Мәселе басы ашық күйде қалып отыр.  

Дегенмен, қазіргі таңда Семей жол дистанциясының теміржолшылары желінің қос қапталын қараусыз малдан сақтандыру үшін қоршауға көшкен. Бұл іс әсіресе биылғы жылы ерекше қарқын алыпты. Мәселен, осыған дейін шаруа қожалықтары жиі орналасқан аумақтардағы салынған 89 шақырым қоршауға тағы да 30 шақырымдық қоршау шаруашылық тәсілмен орнатылып, қосылған. Өткен жылы тек 20 шақырым қоршау ғана салынған еді. Қараусыз мал мәселесі бұл істі ширатуға мәжбүрлеп отыр.  

Сол тәрізді Дегелең – Жаңа-Семей бағытындағы барлық мал қоршаулары теміржолшылардың өз күштерімен жөнделген. Оның 6 шақырымы жаз айларында күрделі жөндеуден өткізіліпті.  

Бұл айтылған деректердің барлығы – тек бір ғана Семей жол дистанциясы бойынша орын алған шаралар. Ал бөлімше көлемінде тағы төрт ПЧ бар екендігін ескерсек, қараусыз мал мәселесі қаншалықты маңызды әрі ауқымды екенін байқауға болады.