Шойынжол тарихы жайлы құнды еңбек жарық көрді
«Қазақстан теміржолшысы» газетінің тілшісі
Теміржолшылардың бастамасымен Қазақстан теміржолының 120 жылдығы аясында Астана локомотив пайдалану депосының тарихы туралы кітап жарық көрді.
Кітаптың жарыққа шығуына бастамашы болған депо директоры – Дулат Ахмадиев. Ал авторлары мен құрастырушылары – музей меңгерушісі, Құрметті теміржолшы, бұрынғы машинист-нұсқаушы Владимир Ульяненко, депо ардагері Далабай Байғожин және локомотивтерді жөндеуді бақылау бөлімінің инженер-технологы Ләйлә Ғабдулина.
«Ұлы жолдың даму кезеңдері. Астана локомотив пайдалану депосының тарихы мен тағдыры» деп аталатын кітап тарихи құнды деректер мен ескі фотосуреттерге толы. Негізгі «қара жұмысты» атқарған кітапты құрастырушы Далабай Байғожин 8 тарау, 137 беттен тұратын жинақты құрастыру үшін депода істеген династия өкілдері мен байырғы қызметкерлерден және олардың туыстарынан ақпарат жинап, қызықты архив материалдары мен фактілер тапқан.
– Менің педагогика білімі бойынша ғылыми дәрежем бар. Кітап шығару ісіне араласуымды сұрағанда қатты қуандым. Депо бастығы кітап бәріне ұғынықты, жалпы оқырманға түсінікті тілде жазылғаны жөн деп кеңес берді. Біз бұл жұмысқа жан-тәнімізбен кірісіп, кейінгі ұрпаққа қызықты көптеген мағлұмат таптық. Сөз жоқ, шойынжол тарихын толықтыратын жинақ болмақ, – дейді Д.Байғожин.
Жинақта депоның құрылған кезінен бастап, ең алғашқы пойыздың Ақмола өңіріне келген сәттері, осы жолда тер төккен династиялар, Құрметті теміржолшылар туралы кеңінен ақпараттар берілген. Әсіресе соғыстан кейінгі жылдардағы депоның даму жолы жан-жақты баяндалып, бүгінге дейінгі тарихы тарқатылған. Депо машинистері Қазақстанда Тальго пойызын алғаш болып тізгіндеп, озық жүйелерді енгізу сәттеріне куә болғаны жазылған. Бүгінгі таңда Астана локомотив пайдалану депосы – ҚТЖ желісінде елордадан Көкшетау, Есіл, Қарағанды, Екібастұз бағытына және кері бағытта жүретін жолаушылар және жүк пойыздарына қызмет көрсететін жетекші кәсіпорынның бірі.
