Әлия Молдағұлова теміржолшылар әулетінде өсті

Биыл қазақтың даңқты батыр қызы Әлия Молдағұлованың туғанына 100 жыл. Қан майданда ерлікпен қаза тапқан қаршадай қыз – ұлт мақтанышы. Даңқты батыр кәсіби теміржолшы Әбубәкір Молдағұловтың қолында тәрбиеленді.  

Жеті жасында жетім қалған Әлияны тәрбиелеген нағашысы Әбубәкір Молдағұлов теміржолшы болған. Оның қазақ даласына алғаш келген Орынбор-Ташкент теміржолында еңбек еткені айтылады.

Әлияның әкесі Нұрмұхамбет халық жауы деп қудаланған. Анасы Маржан 1933 жылы бидай масағын тергені үшін күзетші оғынан қаза тапқан деседі. Деректерде нағашысы Әбубәкір Молдағұлов Мәскеуге, кейін Ленинград қаласына оқуға түскенде отбасымен Әлияны да ертіп жүрген. Батыр қыз Ленинградтағы №46 мектеп-интернатында білім алады. Бұғанасы бекімеген жасөспірім мергендер мектебіне өзі сұранып, кейін өз еркімен майданға аттанған. Он тоғыз жасында жау қолынан қаза тапқан өжет қыздың ерлігі ел жадында. 

Әлияның нағашысы Әбубәкірдің ұлы Сапар Молдағұлов та теміржолшы. Қазір Ақтөбеде тұратын батырдың туысы естелігімен бөлісті.  

«Мен 1941 жылдың мамыр айында дүниеге келдім. Сол кезде 16 жасқа да толмаған Әлия апам мені Ленинградтағы перзентханадан шығарып алған. Соның өзі тарих емес пе?! Біз әулетімізбен теміржол саласында еңбек еткен жандармыз. Менің әкем, анам, өзім, әйелім және балаларым да осы салада еңбек етті», – деді Сапар Молдағұлов.  

Сапар Молдағұлов қазір 84 жаста. Қарт теміржолшы жұбайымен Ақтөбе қаласында тұрады. Қарияның зейнетке шыққанына да 20 жылдан асқан. Еңбек жолын 1958 жылы Шұбарқұдық жол дистанциясына жолшы болып бастап, кейін машинист мамандығын игеріп, сол кездегі «Т2» тепловозын жүргізген. Қарияның жұбайы да Шұбарқұдық депосында 31 жыл кеңсе қызметкері болып еңбек еткен. Қос қарияның балалары да ата жолын таңдаған. «Жезқазған-Сексеуіл» құрылысына үлес қосқан, «Құрмет» орденді теміржолшы Молдағұлов Рүстем Сапарұлы – осы әулеттің өкілі.    

Биыл маусымда Ақтөбе Әлия Молдағұлованың 100 жылдығын атап өтеді. Батыр қыз атындағы мемориалдық музей қайта жарақталды. Әлия Молдағұлованың өмір жолы туралы ақпарат жаңа технологиялардың көмегімен көрсетіліп, туған ауылы мен қоршаудағы Ленинград, ұрыс даласын диорамалар суреттейді. Сонымен қатар Әлияның туған жері Бұлақты ауылында гала-концерт, ғылыми форум ұйымдастырлады. Шараға Әлия Молдағұлованың туыстары, Қазақстанның Халық әртісі, «Әлия» әнін орындаушы Роза Рымбаева, фильмде «Әлия» рөлін сомдаушы қырғызстандық актриса Айтуған Темирова арнайы шақырылған.