Маңғыстаулық маман вагонның ақауын анықтарда дыбысына баса мән береді
«Қазақстан теміржолшысы» газетінің тілшісі
Маңғыстаулық тәжірибелі вагон қараушы Берік Ізденовтің айтуынша, ақау табуда дыбыс айрықша маңызға ие. Жақында жүк пойызының вагонынан ақау тауып, қауіпсіздіктің сақталуына кезекті рет үлес қосқан ол «Адал еңбегі үшін» және «Қозғалыс қауіпсіздігі үшін» төсбелгілерімен марапатталған теміржолшы.
Маңғыстау ЖТ бөлімшесі директорының орынбасары Ерлан Бүркітов Беріктің еңбегін жоғары бағалады. «Бүгін Маңғыстау станциясындағы ВЧД-33 техникалық қызмет көрсету пунктіне «Қауіпсіздік күні» тексерісімен бардым. Бұл жолы аға вагон қараушы Ерлан Ерековтің ауысымы жұмыс істеді. Ағымдағы жылдың 8 наурызында №2774 жүк пойызын техникалық қызмет көрсету кезінде вагон қараушы Берік Ізденов жүк тиелген вагонда қозғалыс қауіпсіздігіне қатер төндіретін ақау – доңғалақ жұбы дискісінің жарықшағын тапқан. Темір жолдың әрбір қызметкері өз энергиясын, таланты мен еңбекқорлығын жұмыста жоғары нәтижелерге қол жеткізуге, сондай-ақ саланы техникалық-технологиялық дамытуға жұмсауы тиіс, біз өз қызметкерлерімізбен мақтанамыз» деп жазады ол әлеуметтік желідегі парақшасында. Пойыздар қозғалысына ауыр зардап әкелуі мүмкін апаттың алдын алған қырағы теміржолшы Берік Ізденовтің вагон шаруашылығында еңбек етіп жүргеніне биыл 22 жыл. Бір бұл емес, осы аралықта қанша вагонның «сырқатын» анықтап, апаттың алдын алды.
Еңбек жолын слесарь болып бастаған Берік қазір 6-разрядты вагон қараушы.