Сай-Өтестегі желілік полицейлер мен теміржолшылар бірлесе әрекет етуге уағдаласты
Маңғыстау облысы бойынша меншікті тілші
Көліктегі полиция департаменті Маңғыстау желілік ішкі істер бөлімінің Сай-Өтес станциясындағы қызметкерлері теміржолшылармен кездесу өткізіп, бірлесе жұмыс істеу жолдарын талқылады.
Олар теміржолшылармен кездесуде ағымдағы жылдың 10-17 наурыз аралығында өткен «Мигрант» жедел профилактикалық іс-шарасы кезінде елде заңсыз жүргендерді анықтап, заңсыз көші-қон арналарының жолын кескен оқиғалар туралы айтып берді. Көші-қон ережелерін бұзған шетелдіктер және шетелдік жұмыс күшін тарту ережелері бұзылған жағдайда заңда көрсетілген тәртіппен қандай шараға тартылатынын да атап көрсетті.
Сонымен қатар 25 қаңтардан бері «Қару» жедел профилактикалық іс-шарасы өтіп жатқанын хабарлап, соған сәйкес заңсыз қару сақтау деректері болса, тәртіп сақшыларына хабарлап, оқ-дәрілерді тәркілеу және оларды сатып алу көздерін, оны заңсыз жеткізу арналарын анықтау бойынша теміржолшыларды бірлесе әрекет етуге шақырды.