Маңғыстауда теміржолға тым жақын орналасқан автожол қауіп төндіріп тұр

Аймақтар

05.04.2022, 11:52

Маңғыстау облысы бойынша меншікті тілші

Маңғыстау жол дистанциясының мамандарын былтырдан бері алаңдатып отырған бір мәселе бар. Ол – бірінші санатты теміржол өткеліне жанасатын автокөлік жолының жайы.

Айтуларынша, бірінші категориялы теміржол өткеліне 100 метр қашықтықта екінші деңгейлі автокөлік жолы болмауы тиіс. Министрліктің арнайы бұйрығында бұл туралы тайға таңба басқандай көрсетілген. Сондықтан, Маңғыстау жол дистанциясына қарайтын күзетпелі өткелдердің біріне жақын орналасқан екінші деңгейлі автокөлік жолы алаңдатпай қоймайды.

– Бұл жөнінде Маңғыстау ауданы әкімі Т.Көшмағанбетовке хат жаздық. Онда теміржол қауіпсіздігін сақтау мақсатында ҚР Индустрия және инфрақұрылымдық даму министрінің 2019 жылғы 10 шілдедегі №495 бұйрығының 2-тарау 23-тармақшасына сәйкес, Шетпе станциясына таяу 314-шақырымдағы «Қазына Маңғыстау» ЖШС-не тиесілі теміржол өткеліне жанасып қауіп тудырып тұрған қиыршықтасты автомобиль жолын жабуға ықпал етуді сұрадық. Жоғарыда келтірілген бұйрық негізінде бірінші категориялы өткелге 100 метр қашықтықта жанама екінші деңгейлі жол болмауы қажет. Пойыз келіп жатқанда тым жақын жерде көліктер кептелісі қозғалысқа қауіп төндіреді. Оның үстіне телімнен жолаушы да, жүк те пойыздары жиі өтеді, Тальго жүрдек пойызы да жүреді, – деген Маңғыстау жол дистанциясының жетекші инженері Мұхтар Кульчанбаев әкімдікке жіберілген хаттан жауап келмегенін қынжылыспен жеткізді.

Айтуынша, дәл осы жолды өткен 2021 жылдың 23 сәуірінде бірнеше құзырлы мекеме өкілдері бірлесе жапқан. Арнайы акт түзіп, жолдың қызметін ресми түрде тоқтатқан. Бірақ, мүдделі тараптардың күш салуымен уақыт өте келе қайта ашылған. Бұл – республикалық деңгейдегі маңызды магистраль емес, сондықтан оны теміржол өткелінен қауіпсіздік қағидатына сәйкес талапқа сай қашықтықта өткізу қажет деп санайды теміржолшылар.

Маңғыстауда теміржолға тым жақын орналасқан автожол қауіп төндіріп тұр

Басқа да жаңалықтар