Жыл басынан бері өткелдерде 7 жол-көлік оқиғасы болған
Маңғыстау облысы бойынша меншікті тілші
Маңғыстау жол дистанциясында ақпан айынан бері жалғасып келе жатқан профилактикалық жұмыстар теміржол өткелдерінде жол-көлік оқиғаларының алдын алуға бағытталған, деп хабарлайды Rail-news.kz.
Дистанция мамандары жергілікті әкімшілік пен жол полициясы өкілдерінің қатысуымен осыған дейін Өзен, Шетпе, Маңғыстау, Жетібай станцияларындағы өткелдер мен жол аралықтарында арнайы рейд өткізді. Олар жергілікті халықпен кездесіп, өткелдерден әрі-бері өтіп жатқан автокөлік иелерін де тоқтатып, ақпараттық-түсіндіру жұмыстарын жүргізді. Түрлі мысалдар келтіріп, өткелден өтерде ереже бұзбай қауіпсіздікті сақтауға шақырды.
– Магистральдық желі дирекциясы бойынша осы жылы 7 жол-көлік оқиғасы тіркелді. Оның үшеуі күзетілетін, төртеуі күзетсіз өткелде орын алған. Соның ішінде Қостанайда – 3, Алматы теміржолында – 2, Шымкент пен Ақтөбе магистральдық желі бөлімшелері бойынша 1 жағдай. Осындай келеңсіз көрсеткіштердің көбеюіне байланысты жоғарыдан профилактикалық шараларды күшейту туралы жеделхат келген болатын. Мұндай фактілердің қайталанбауы үшін дистанцияда қажетті шаралар қолға алынып, бірталай жұмыс атқарылды. Өткелдерде автокөлік жүргізушілерімен, аталған нысандарға жақын орналасқан елдімекен тұрғындарымен кездесулер өтті. Барлығы 113 жүк көлігі, 167 жеңіл машина, 31 автобус жүргізушісіне өткелден өту ережесі мен теміржол қауіпсіздігін сақтау тәртібі түсіндірілді. Жол-көлік оқиғасы жиі болатын өткелдер назарға алынып, қауіпсіздік жұмыстары күшейтілді. Бізде мұндай жағдай 2020-2021 жылдары Боржақты станциясы мен Р бекеті аралығында орын алған еді, – дейді бұл туралы Маңғыстау жол дистанциясының жетекші инженері Мұхтар Кульчанбаев.