Жыл басынан бері Сай-Өтесте қоғамдық тәртіпті бұзған 4 жолаушы пойыздан түсірілген
Маңғыстау облысы бойынша меншікті тілші
Соңғы кезде жолаушы пойыздарында тәртіп сақтамай, түрлі құқық бұзушылықтарға себеп болатындар көбейген көрінеді. Олардың дені әрине, ішімдік ішіп алып, өзінің де, өзгенің де шырқын бұзатындар. Осылай дабыл қаққан желілік полиция өкілдері қазір мұнымен күресу қарекетінде.
Жүргізілген жұмыстар нәтижесіз емес, Маңғыстау өңірі бойынша жолаушы пойызында шатақ шығаратындар өткен жылдан азайған. Бірақ Сай-Өтес станциясының аумағында, керісінше, көбейген. Жыл басынан бергі үш айда перрондар мен жолаушылар пойызында қоғамдық тәртіпті бұзған 14 факт тіркеліпті. Барлығына хаттама толтырылып, айыппұл салынған. Ал төрт жолаушы пойыздан түсірілген.
Сай-Өтес станциясындағы ЖПб-нің басшысы Нұрлыбек Рахметовтің айтуынша, өткен жылдың бірінші тоқсанында пойызда қоғамдық тәртіп бұзған 11 дерек тіркелген, биыл ол 3 фактіге артқан. Сондықтан мұндай келеңсіздіктің жолын кесу үшін сайөтестік желілік полиция қызметкерлері жақында Шетпе, Сай-Өтес станцияларында теміржол вокзалына жақын дүкендер мен дәмханаларда алкогольдік ішімдік сатуға лицензияларының бар-жоғына тексеріс жүргізді. Өйткені, жоғарыдағы пойызда шу шығарып, жолаушылардың мазасын алатындар, негізінен, осындай қоғамдық тамақтану орындардан ішімдік ішіп шығатыны анықталған.